Եվրահանձնաժողովը նոր միջոցներ է ձեռնարկել՝ ի պատասխան ԱՄՆ-ի մաքսատուրքերի
Եվրահանձնաժողովն արագ և համաչափ հակամիջոցներ է ձեռնարկում Եվրամություն ամերիկյան ապրանքների ներմուծման նկատմամբ՝ ի պատասխան պողպատի և ալյումինի ներմուծման համար ԱՄՆ-ի սահմանած նոր մաքսատուրքերի: Այյս մասին ասված է Եվրահանձնաժողովի հրապարակած հայտարարության մեջ։
Ըստ փաստաթղթի՝ ի պատասխան ԱՄՆ-ի նոր մաքսատուրքերի, որոնք տարածվում են ԵՄ-ի ավելի քան 18 միլիարդ եվրոյի արտահանման վրա, Եվրահանձնաժողովը գործարկում է նոր հակամիջոցների փաթեթ ամերիկյան արտահանման նկատմամբ:
Դրանք ուժի մեջ կմտնեն ապրիլից՝ անդամ պետությունների և շահագրգիռ կողմերի հետ խորհրդակցություններից հետո:Բացի լրացուցիչ միջոցների նոր փաթեթից, Եվրահանձնաժողովը նաև կվերականգնի 2018 և 2020 թվականներին ընդունված հավասարակշռման միջոցները, որոնք ավելի վաղ կասեցվել էին։
Եվրամիության պատասխան միջոցները եվրոպական պողպատի և ալյումինի նկատմամբ ԱՄՆ մաքսատուրքերի դեմ կարող են չեղյալ հայտարարվել «ցանկացած պահի»՝ Վաշինգտոնի հետ համաձայնություն ձեռք բերվելու դեպքում։Եվրահանձնաժողովի ղեկավար Ուրսուլա ֆոն դեր Լայենը Եվրոպայից ներմուծվող պողպատի և ալյումինի համար ամերիկյան մաքսատուրքերին ԵՄ պատասխան միջոցները որակել է «ուժեղ, բայց համաչափ»։
«Եվրամիությունը պետք է գործի, որպեսզի պաշտպանի բիզնեսը և սպառողներին: Հակամիջոցները, որոնք մենք այսօր ընդունում ենք, ուժեղ են, բայց համաչափ», – հայտարարել է ֆոն դեր Լայենը:
Նա նշել է, որ 26 մլրդ եվրոյի ներմուծվող ապրանքների նկատմամբ մաքսատուրքերի սահմանումը «համապատասխանում է ԱՄՆ-ի մաքսատուրքերի տնտեսական մասշտաբին»:
Արտերկրից պողպատի և ալյումինի բոլոր մատակարարումների, ներառյալ ԵՄ-ից ներմուծումների համար 25%-ի չափով մաքսատուրքեր սահմանելու ԱՄՆ նախագահ Դոնալդ Թրամփի որոշումն ուժի մեջ է մտել մարտի 12-ին:
