Չինաստանի լուսնային զոնդը վերադարձել է Երկիր՝ Լուսնի հազվագյուտ նմուշներով
Չինաստանի լուսնային զոնդը վերադարձել է Երկիր՝ իր հետ բերելով լուսնի չհետազոտված հակառակ կողմից առաջին նմուշները։ Այս մասին հաղորդում է Xinhua գործակալությունը։
«Չանյե-6» զոնդը, որն այդպես անվանվել է չինական դիցաբանության լուսնի աստվածուհու պատվին, վայրէջք է կատարել նախանշված վայրում՝ Չինաստանի Ներքին Մոնղոլիայի Ինքնավար Մարզում, տեղական ժամանակով ժամը 14։07-ին։
«Չանյե-6»-ի առաքելությունը տևել է գրեթե երկու ամիս։
Չինաստանի նախագահ Սի Ծինփինը շնորհավորել է «Չանյե-6»-ի հաջող առաքելության կապակցությամբ՝ դա անվանելով կարևոր ձեռքբերում տիեզերքի և գիտական տեխնոլոգիաների ոլորտում առաջատար երկիր դառնալու իր նպատակներին հասնելիս։
Լուսնի հակառակ կողմ տեխնիկապես դժվար է հասնել խորդուբորդ տեղանքի և խորը խառնարանների պատճառով:
Գիտնականներին հետաքրքրում է Լուսնի՝ այս քիչ հետազոտված կողմը, քանի որ հույս կա, որ այնտեղ կարող են լինել սառույցի հետքեր, որից կարելի է ստանալ ջուր, թթվածին և ջրածին։
Չինաստանը միակ երկիրն է, որին հաջողվել է վայրէջք կատարել Լուսնի հակառակ կողմում։ Նման առաքելություն երկիրն իրականացրել էր նաև 2019 թվականին։ Սա Չինաստանի վեցերորդ առաքելությունն է դեպի լուսին, երկրորդը՝ դեպի դրա հակառակ կողմ։
Չինաստանը պլանավորում է անձնակազմով առաքելություն ուղարկել Լուսին մինչև 2030 թվականը։
