Միրզոյանն ու Լավրովը կարևորել են Երևանի և Բաքվի միջև հարաբերությունների կարգավորման ջանքերի ակտիվացումը
Հայաստանի արտաքին գործերի նախարար Արարատ Միրզոյանը և Ռուսաստանի արտաքին գործերի նախարար Սերգեյ Լավրովը Սամարղանդում կայացած հանդիպման ընթացքում քննարկել են երկկողմ օրակարգի արդիական հարցեր, մտքեր են փոխանակել տարածաշրջանային խնդիրների շուրջ։
Միրզոյանի և Լավրովի հանդիպման վերաբերյալ մանրամասներ է հայտնել Ռուսաստանի արտաքին գործերի նախարարությունը։
«Արտաքին քաղաքական գերատեսչությունների ղեկավարները քննարկել են երկկողմ օրակարգի մի շարք արդիական հարցեր։ Տեղի է ունեցել մտքերի փոխանակում տարածաշրջանային խնդիրների շուրջ։ Նշվել է հայ-ադրբեջանական հարաբերությունների կարգավորման բոլոր ուղղություններում ջանքերի ակտիվացման կարևորությունը՝ համաձայն 2020-2022 թթ. Ռուսաստանի, Հայաստանի և Ադրբեջանի ղեկավարների պայմանավորվածությունների», – նշված է հաղորդագրությունում։
Ըստ ՌԴ ԱԳՆ-ի՝ կողմերը պայմանավորվածություն են ձեռք բերել հետագա դիվանագիտական շփումների մասին։
