«Ադրբեջանի համար սարսափելի հետևանքներ են լինելու, սարսափելի». Դավիթ Տոնոյան
ՀՀ պաշտպանության նախարար Դավիթ Տոնոյանը պատասխանելով «Զինուժ մեդիայի» հարցերին՝ անդրադարձել է Ադրբեջանի ռազմաքաղաքական ղեկավարության այն պնդումներին, թե Հայաստանն է հարվածներ հասցրել Ադրբեջանի բնակավայրերին։
– Պարոն նախարար, Ադրբեջանի պաշտպանության նախարարը քիչ առաջ հայտարարեց, որ Հայաստանի գործողությունների պատճառով ընդլայնվելու է մարտական գործողությունների գոտին։ Ձեր կարծիքով՝ ի՞նչ է դա նշանակում։
– Կարծում եմ՝ Ադրբեջանի Պաշտպանության նախարարն իր խորը զինվորական գիտելիքներով երևի թե խառնել է մարտական գործողությունների ընդլայնման գոտին, որը որ ներառում է Հայաստանի Հանրապետությունը, մասնավորապես՝ Վարդենիսի շրջանի բնակավայրերը հրետակոծվել են՝ օգտագործել են ծանր հրետանի և անօդաչու թռչող սարքեր։ Եվ դա եթե իր համար դեռևս մարտական գոտու ընդլայնում չէ, թող դրանից մասնագետները եզրակացություն անեն։
– Քիչ առաջ Ադրբեջանի պաշտպանության նախարարը կրկին մեղադրանքներ հնչեցրեց, որ Հայաստանի տարածքից իրականացվել են Ադրբեջանի բնակավայրերի հրթիռակոծումներ։
– Հայաստանի Հանրապետության տարածքից Ադրբեջանի տարածք որևէ հեռահար հրետակոծություն կամ հրթիռների օգտագործում չի իրականացվել դեռևս, և եթե Ադրբեջանի զինված ուժերի համար կամ ռազմաքաղաքական ղեկավարության համար Ստեփանակերտը, Մարտունին, Հադրութը, Մարտակերտը և այլ բնակավայրերը թույլատրելի մարտական գործողությունների անցկացման վայր է, ապա մեր Պաշտպանական բանակի, Արցախի զինված ուժերի արհեստավարժ, հմուտ ստորաբաժանումները շատ կտրուկ պատասխանում են։ Եվ Ադրբեջանի համար սարսափելի հետևանքներ են լինելու, սարսափելի։
