«Այլ պաշտպանական կազմակերպությունը՝ ՆԱՏՕ-ն, որի անդամ մենք չենք, խաղաղության կոչ է անում, իսկ ՀԱՊԿ-ը նույնիսկ չեզոք կոչ չի արել». Դանիել Իոաննիսյան

Քիչ առաջ «Իրազեկ քաղաքացիների միավորում» հ/կ հիմնադիր Դանիել Իոաննիսյանն իր ֆեյսբուքյան էջում գրել էր.«Ո՞նց է ՀԱՊԿ-ը… Դե, բացի նրանից, որ առավոտվանից Արցախի վրա թափում են ռուսական «Սմերչ»-ի ու Բելառուսական «Պոլոնեզները»-ի հրթիռները»:

168.am-ը Դ. Իոաննիսյանի այս գրառման վերաբերյալ զրուցեց վերջինի հետ:

-Կարծում եք՝ այս իրավիճակում, երբ իրական պատերազմ է ընթանում, և մեր զենքի հիմնական մատակարարն էլ ըստ էության Ռուսաստանն է, տեղի՞ն է այսպիսի գրառմամբ հանդես գալը:

-Այս պահին մենք տեսնում ենք, որ Արցախն ակտիվորեն հրթիռակոծվում է, այդ թվում և ռուսական, Ռուսաստանի կողմից վաճառված, խոշոր տրամաչափի ծանր հրետանային միջոցներով, և սա է այն փաստական իրականությունը, որը մենք ունենք: Ես կարծում եմ, որ, այո, Ռուսաստանը պետք է վերանայի այս մոտեցումը դաշնակիցների նկատմամբ, այո, սա քննադատություն է Ռուսաստանի կողմից դա չանելու կամ ոչ բավարար կերպով անելու վերաբերյալ:

-Խոսեցիք փաստական իրականության մասին: Փաստական իրականություն է նաև այն, որ Հայաստանին զենք մատակարարող հիմնական երկիրը Ռուսաստանն է: Այսպիսի գրառումները որքանո՞վ են նպաստելու լարվածության թուլացմանը կամ կնպաստե՞ն թե՞ ավելի կթեժացնեն: Մենք այս պահին որտեղի՞ց կարող ենք աջակցություն ակնկալել, եթե տարածաշրջանում Թուրքիան այսպիսի ակտիվություն է ցուցաբերում:

-Այո, և սա նաև փոքրիկ ուղերձ է, եթե կարելի է, իհարկե, այդպես ասել, Ռուսաստանին առ այն, որ պետք է ավելի լուրջ վերաբերվեն և պետք է ավելի հետևողական լինեն դաշնակիցների պաշտպանության առումով:

-Դուք իմ հարցին չպատասխանեցիք ամեն դեպքում, որովհետև ես ուրիշ բանի մասին էի հարցնում: Ինչևէ: ՀԱՊԿ-ի մասին եք խոսում, բայց այս պահին գործողություններն Արցախում են ծավալվում, ՀԱՊԿ-ը այստեղ ի՞նչ դերակատարում ունի:

-Ոչ միայն: Պաշտոնական տեղեկատվության  համաձայն՝ նաև Վարդենիսում են տեղի ունեցել որոշակի գործողություններ: Վարդենիսը ՀՀ անբաժանելի մասն է: Եվ, ի վերջո, ինձ համար անհասկանալի է, թե ո՞նց է ստացվում, որ ՆԱՏՕ-ի արձագանքն ավելի արագ է, որոշակի առումով ավելի կոշտ է, քան ՀԱՊԿ անդամ երկրների կամ ՀԱՊԿ-ի արձագանքը: Բացարձակապես անհասկանալի է, որ ՆԱՏՕ-ն ավելի արագ արձագանքի, քան ՀԱՊԿ-ը:

-Իսկ որպեսզի ՀԱՊԿ-ն այս իրադրության մեջ միջամտի, հայկական կողմը պետք է դիմի ՀԱՊԿ-ին: Հայկական կողմը ՀԱՊԿ-ին դիմե՞լ է:

-Հայկական կողմը ՆԱՏՕ-ին դիմե՞լ է: Եկեք խոսենք փաստերով: Կա ՆԱՏՕ-ի արձագանքը: ՀԱՊԿ-ի արձագանք կա՞:

-Իսկ պարտավորությունները ՀԱՊԿ-ի և ՆԱՏՕ-ի առնչությամբ նո՞ւյնն են:

-Իհարկե, ոչ: ՆԱՏՕ-ինը շատ ավելի ցածր են, ՀԱՊԿ-ինը շատ ավելի բարձր են: ՀԱՊԿ-ը պետք է հազար անգամ ավելի արագ արձագանքեր, քան ՆԱՏՕ-ն, որովհետև խոսքը գնում է ՀԱՊԿ անդամ երկրներից մեկի մասին: ՆԱՏՕ-ի անդամ երկիր այս կոնֆլիկտում գոնե բացահայտ չկա:

-ՆԱՏՕ-ի անդամ երկիր Թուրքիան բացահայտ չէ՞ միջամտում այս գործընթացներին:

-Դե իրենք ավելի ծպտյալ են աջակցում, բայց ՆԱՏՕ-ի արձագանքից դատելով՝ ՆԱՏՕ-ի և Թուրքիայի մոտեցումները լիովին տարբերվում են: ՆԱՏՕ-ն կոչ է անում խաղաղության, իսկ Թուրքիան ամբողջությամբ աջակցում է Ադրբեջանին:

-Իսկ թուրքական պաշտոնյաների հայտարարությունները այս օրերին չե՞ք կարդացել: Թուրքիան ՆԱՏՕ-ի անդամ երկիր է:

-Այո, բայց ՆԱՏՕ-ի արձագանքն այլ էր: Նրա արձագանքը խաղաղության կոչ էր: Թուրքիան աջակցում է ագրեսոր Ադրբեջանին, ՆԱՏՕ-ն  կոչ է անում խաղաղության: Դրանք հստակ, տրամագծորեն տարբերվող մոտեցումներ են: Իսկ ՀԱՊԿ մոտեցումը ընդհանրապես չկա: Ո՞րն է ՀԱՊԿ-ի մոտեցումը:

-Այսինքն՝  Դուք կարծում եք, որ Ձեր այս գրառումը իրավիճակի դեէսկալացիային նպաստող գրառո՞ւմ է:

-Հարցը նրանում չի՝ էսկալացիային նպաստող թե՞ չնպաստող: Հարցը հետևյալն է, որ մենք պաշտպանական կազմակերպության անդամ ենք: Այլ պաշտպանական կազմակերպությունները, որի անդամ մենք չենք, խաղաղության կոչ է անում, իսկ բոլորս գիտենք, որ խաղաղությունը խախտողն Ադրբեջանն է, իսկ ՀԱՊԿ-ը նույնիսկ չեզոք կոչ չի արել:

-Երրորդ անգամ հարցս կրկնեմ: Ձեր գրառման մեջ Դուք նշում էիք, որ որ առավոտվանից Արցախի վրա թափում են ռուսական «Սմերչ»-ի ու Բելառուսական «Պոլոնեզները»-ի հրթիռները: Ռուսական զենքը մեր կողմից այս պահին թափվում է նաև ադրբեջանական տարածքի վրա:

-Մենք չենք հարձակվել:

-Իհարկե, մենք չենք հարձակվել, բայց մենք պաշտպանվում ենք ռուսական զենքով:

-Մենք ռուսական, հայկական, վիետնամական կամ նիկարագուական զենքով ոչ մեկի վրա չենք հարձակվել: Մենք այդ զենքը օգտագործում ենք պաշտպանության նպատակով:

-Այո, բայց պաշտպանվում ենք ռուսական զենքով:

-Ցանկացած զենք վաճառողի պետք է ակնհայտ լինի, որ եթե ինքը զենք է վաճառում Հայաստանին, այդ զենքը օգտագործվելու է պաշտպանվելու համար: Հայաստանը հարձակվող չէ: Եթե զենքը վաճառում է Ադրբեջանին, ապա այդ զենքը օգտագործվելու է հարձակման համար: Կներեք էլի, կա՞ մեկը, ում դա պարզ չէ: Եթե Ռուսաստանը այդքան չսպառազիներ Ադրբեջանին, Ադրբեջանի մտքով չէր անցնի մեզ վրա հարձակվել:

-Դուք հետևո՞ւմ եք միջազգային արձագանքին: Միջազգային լրահոսում Հայաստա՞նը թե՞ Ադրբեջանն են այս պահի դրությամբ շահեկան դիրքերից հանդես գալիս: Տեղեկատվական պատերազմում մենք ի՞նչ դիրքեր ունենք:

-Ես չեմ ասի, որ լավագույն, բայց աշխատում ենք: Մենք՝ որպես պետություն, աշխատում ենք: Կան թե բավականին շատ հայտարարություններ, որ ուղղված են խաղաղությանը, իսկ հստակեցնենք, որ խաղաղությունը բխում է մեր շահերից: Մենք չենք խաղաղությունը խախտել, և հետևաբար խաղաղությանն ուղղված բոլոր հայտարարությունները ես գոնե ընկալում եմ որպես մասնակի հայանպաստ: Եվ կան բազմաթիվ միջազգային կառույցներ, միջազգային շատ հեղինակավոր լրատվամիջոցներ, որոնց հետ շատ էֆեկտիվ աշխատանք է տարվում, և որոնք բավականին ինչ-որ առումով միացել են Ադրբեջանի ապատեղեկատվության դեմ դիմադրությանը: