Գործարարները պնդում են՝ «Աշտարակ կաթի» խարդախության զոհ են դարձել
Այսօր Կառավարության դիմաց էին հավաքվել «Աշտարակ կաթ» ընկերության սնանկ ճանաչվելուց տուժած գործարարները: Նրանց ներկայացուցիչ Կարեն Հովհաննիսյանը 168.am-ի հետ զրույցում ասաց, որ Կառավարության առջև հավաքված մարդիկ «Աշտարակ կաթի» մեծ խարդախության զոհերն են:
Ընկերության սնանկ ճանաչվելուց հետո գործարարներից պահանջվել են գումարներ, որոնք, իբրև թե, նրանք պարտք են «Աշտարակ կաթին»:
Տուժող գործարար Օվսաննա Ասատրյանն ասում է, որ վճարումները պատշաճ կատարել է, բայց հիմա իր խանութի հաշիվները սառեցված են, և ինքը ստիպված է լինելու վճարել երկրորդ անգամ:
«Մենք գումարներն «Աշտարակ կաթին» փոխանցել ենք առաքիչների միջոցով: Ընկերությունը մեզ դատի է տվել, որ մենք իրեն պարտք ենք, առաքիչները եկել ցուցմունք են տվել, որ մենք բարեխղճորեն կատարել ենք մեր վճարումները: Անգամ «Աշտարակ կաթի» գլխավոր հաշվապահն է ցուցմունք տվել, որ վճարումները պատշաճ կատարվել են»:
Նրանք ՀՀ կառավարությունից պահանջում են հետևողական լինել, քանի որ խնդիրն արդեն քանի ամիս որևէ լուծում չի ստանում:
Բողոքի ակցիայի մասնակիցների խոսքով՝ բոլոր խանութների հաշիվների վրա բռնագանձում է տարածվում, ինչի պայմաններում աշխատել չեն կարողանում:
Մանրամասները՝ տեսանյութում
ԱՆԱՀԻՏ ՀՈՎՀԱՆՆԻՍՅԱՆ
