Նախարար Բադասյանը հրաժեշտի հանդիպում է ունեցել Միացյալ Թագավորության դեսպանի հետ
Արդարադատության նախարար Ռուստամ Բադասյանն այսօր ընդունել է Հայաստանում դիվանագիտական առաքելությունն ավարտող Մեծ Բրիտանիայի և Հյուսիսային Իռլանդիայի Միացյալ Թագավորության արտակարգ և լիազոր դեսպան Ջուդիթ Մարգարեթ Ֆարնուորթին:
Ինչպես տեղեկացրին ՀՀ ԱՆ տեղեկատվության և հասարակայնության հետ կապերի վարչությունից, նախարարը շնորհակալություն է հայտնել դեսպանին պաշտոնավարման ընթացքում ծավալած արդյունավետ գործունեության համար, բարձր գնահատել նրա անձնական ջանքերն ու ներդրումը հայ-բրիտանական կապերի ամրապնդման ու զարգացման գործում և հույս հայտնել, որ դեսպանը Հայաստանից հեռանում է լավ տպավորություններով:
Դեսպան Ֆարնուորթը ևս շնորհակալություն է հայտնել նախարար Բադասյանին արդյունավետ համագործակցության համար, Նախարարության հետ փոխգործակցությունը գնահատել արդյունավետ և վստահեցրել, որ Միացյալ Թագավորությունը շարունակելու է իր աջակցությունը՝ մի շարք առանցքային ոլորտներում բարեփոխումներ իրականացնելու հարցում: Դրանցից դեսպանն առանձնացրել է Հակակոռուպցիոն ռազմավարության ընդունումից հետո նախատեսվող միջոցառումների իրականացումն ու Պրոբացիայի ծառայության կարողությունների զարգացումը:
Ռուստամ Բադասյանը հաջողություն է մաղթել Ջուդիթ Մարգարեթ Ֆարնուորթին հետագա ձեռնարկներում և հույս հայտնել, որ հետայսու ևս իր գործունեությամբ կնպաստի հայ-բրիտանական հարաբերությունների առավել զարգացմանը։
Շնորհակալություն հայտնելով բարեմաղթանքների համար՝ դեսպան Ֆարնուորթը վստահեցրել է, որ Հայաստանից հեռանում է վառ հիշողություններով և արձակուրդները Հայաստանում անցկացնելու հստակ նպատակադրմամբ:
