Պերեսն առաջարկել է Զիդանին վերադառնալ «Ռեալ», վերջինս կպատասխանի հունիսին
«Ռեալի» նախագահ Ֆլորենտինո Պերեսը մտադիր է հեռացնել թիմի գլխավոր մարզիչ Սանտյագո Սոլարիին:
Ըստ El Chiringuito-ի՝ արգենտինացի մարզիչը կարող է հեռացվել մինչև Իսպանիայի առաջնության «Վալիադոլիդի» դեմ կայանալիք շաբաթօրյա խաղը: Բացի այդ, աղբյուրը հաղորդում է, որ «Այաքսի» հետ խաղից հետո Պերեսը կապվել է թիմի նախկին գլխավոր մարզիչ Զինեդին Զիդանի հետ և առաջարկել է նրան անհապաղ վերադառնալ «Սանտյագո Բերնաբեու»:
Զիդանը պատասխանել է մերժմամբ. նա չի ուզում անցնել աշխատանքի մրցաշրջանի ընթացքում: Սակայն ֆրանսիացին հույս է տվել Ֆլորենտինոյին. նա դեմ չէ վերադառնալ «Բերնաբեու», և հունիսին, հնարավոր է, կանցնի աշխատանքի:
«Ռեալը» ՉԼ-ի պատասխան խաղում 1:4 հաշվով պարտվեց «Այաքսին» և դուրս մնաց մրցաշարից: Դրանից առաջ մադրիդցիները երկու անգամ պարտվել էին «Բարսելոնային»:
Պատրաստեց Անի Գաբուզյանը
