Թուրքիայում գործազրկության մակարդակը հասել է 11․9 տոկոսի
Թուրքիայի Սոցիալական քաղաքականության կիրառման և ուսումնասիրության կենտրոնի (SPM) զեկույցի համաձայն՝ երկրում գործազրկության մակարդակը շարունակում է աճել։
Այս մասին տեղեկացնում ermenihaber.am-ը: Զեկույցի համաձայն՝ 2018թ․ նոյեմբերին Թուրքիայում գործազրկության մակարդակը հոկտեմբերի համեմատ աճել է 0․3 տոկոսով՝ հասնելով 11․9 տոկոսի։ Նույն շրջանում ոչ գյուղատնտեսական ոլորտում գործազրկության աճը կազմել է 0․4 տոկոս՝ հասնելով 14 տոկոսի։
Ըստ SPM-ի հաշվարկների՝ աշխատանք ունեցողների թիվը նվազել է 0․5 տոկոսով՝ կազմելով 47 տոկոս, իսկ մասնավորապես արդյունաբերության ոլորտում աշխատողների թիվը կրճատվել է 44․000-ով՝ հասնելով 5 մլն 652․000-ի։
2018թ․ սեպտեմբերին գործազրկության մակարդակը կազմել էր 11․4 տոկոս, աշխատանք ունեցողների թիվը՝ 47․8 տոկոս, իսկ արդյունաբերության ոլորտում աշխատողների թիվը կազմել էր 5 մլն 699․000։
Այսպիսով, կազմակերպությունը արձանագրել է, որ 2018թ․ սեպտեմբեր – նոյեմբեր եռամսյակում Թուրքիայում գործազրկության մակարդակը շարունակաբար ավելացել է, իսկ աշխատանք ունեցողների և արդյունաբերության ոլորտի աշխատակիցների թիվը՝ նկատելիորեն նվազել։
