Բաքվում հայտարարել են, թե բարեկամ ու հարևան երկրներում գործող որոշակի ուժեր «փորձում են Ադրբեջանում էթնիկ, կրոնական և քաղաքական բախումներ հրահրել»
Բարեկամ և հարևան երկրներում գործող որոշակի ուժեր «փորձում են Ադրբեջանում էթնիկ, կրոնական և քաղաքական բախումներ հրահրել՝ տարբեր ալիքներով ապատեղեկատվություն տարածելով․ այս մասին նշվում է Ադրբեջանի խորհրդարանի արտաքին միջամտության և հիբրիդային սպառնալիքների դեմ պայքարի ժամանակավոր հանձնաժողովի հայտարարությունում։
Հայտարարության մեջ նշվում է, թե իբր «Ադրբեջանի միջազգային հեղինակության աճի, էներգետիկ անվտանգության ապահովման գործում նրա դերի, տարածաշրջանային տարանցիկ միջանցքներում նրա ռազմավարական նշանակության և ներքաղաքական կայունության ֆոնին, երկրի դեմ օտարերկրյա գործիչների կողմից հիբրիդային հարձակումներն աճել են»։
Ըստ հանձնաժողովի՝ համապատասխան պետական մարմինների հետ համատեղ անցկացված հետաքննությունները բացահայտել են հասարակական կարծիքի մանիպուլյացիայի, հասարակության մեջ բևեռացման առաջացման և պետական մարմինների նկատմամբ վստահության խաթարմանն ուղղված գործունեություն։
Այս գործողությունները, ըստ տեղեկությունների, իբր իրականացվում են ազդեցության գործակալների, գաղտնի կազմակերպությունների, հաքերային խմբերի, օտարերկրյա լրատվամիջոցների, սոցցանցային կեղծ հաշիվների և ներքին և միջազգային մակարդակներում գործող բոտերի միջոցով։
