Ղազախստանը զորք կուղարկի Գազա, իսկ Ադրբեջանը՝ փող
Ղազախստանի զինուժը Գազայի հատվածում կպահպանի խաղաղությունը։ Այդ մասին հայտնում է «Դոյչե վելեն». նման համաձայնություն ձեռք է բերվել Վաշինգտոնում կայացած Խաղաղության խորհրդի առաջին նիստում, որը վարել է Դոնալդ Թրամփը։ Նա հայտարարել է, որ հինգ երկրներ համաձայնել են զորքեր ուղարկել Գազա՝ Մարոկկոն, Ալբանիան, Կոսովոն, Ինդոնեզիան և Ղազախստանը։
Հանդիպմանը մասնակցած նախագահ Կասիմ-Ժոմարտ Տոկաևը հաստատել է իր մտադրությունը՝ «աջակցել Միջազգային կայունացման ուժերին՝ ուղարկելով ռազմական ստորաբաժանումներ, այդ թվում՝ բժշկական», ինչպես նաև խաղաղապահներ։ Տոկաևի խոսքով՝ Աստանան նաև կտրամադրի ֆինանսավորում, սնունդ և այլ մարդասիրական օգնություն Գազայի հատվածին և կմասնակցի ավերված շենքերի վերականգնմանը։
Թրամփը հայտարարել է, որ Խաղաղության խորհրդի երկրները խոստացել են 7 միլիարդ դոլար տրամադրել Գազայի հատվածին։ Այս համաձայնագիրը կնքվել է Ղազախստանի, Ադրբեջանի, ԱՄԷ-ի, Մարոկկոյի, Բահրեյնի, Կատարի, Սաուդյան Արաբիայի, Ուզբեկստանի և Քուվեյթի կողմից։ Միացյալ Նահանգները կավելացնի ևս 10 միլիարդ դոլար այս գումարին, իսկ ՄԱԿ-ը կներդնի 2 միլիարդ դոլար։ ՖԻՖԱ-ն նաև 75 միլիոն դոլար կհատկացնի սպորտին վերաբերող նախագծերի համար։
Միջազգային կայունացման ուժերի խնդիրն է Գազայում պահպանել կարգուկանոնը, վերահսկել հրադադարը և նպաստել երկարատև խաղաղությանը։ Ինդոնեզիան հայտարարել է, որ կարող է տեղակայել 5000-ից 8000 զինվոր։ Դեռևս պարզ չէ, թե որքան զորք կներդնեն այլ երկրները։ Եվրոպական շատ երկրներ, այդ թվում՝ Ֆրանսիան և Գերմանիան, հրաժարվում են մասնակցել Խաղաղության խորհրդին։
