Արաղչին կհանդիպի Ատոմային էներգիայի միջազգային գործակալության ղեկավարի հետ
Իրանի արտաքին գործերի նախարար Աբբաս Արաղչին հայտարարել է, որ փետրվարի 16-ին Ժնևում՝ ԱՄՆ-Իրան միջուկային բանակցությունների երկրորդ փուլից մեկ օր առաջ, կհանդիպի Ատոմային էներգիայի միջազգային գործակալության (ԱԷՄԳ) գլխավոր տնօրեն Ռաֆայել Գրոսիի հետ։ Ինչպես հաղորդում է «Արմենպրես»-ը, այս մասին նա գրում է կատարել X-ի իր էջում։
«Միջուկային փորձագետների հետ այսօր հանդիպելու եմ Ռաֆայել Գրոսիի հետ՝ խորը տեխնիկական քննարկման նպատակով։ Երեքշաբթի ԱՄՆ-ի հետ բանակցություններին ընդառաջ կհանդիպեմ Օմանի արտգործնախարար Բադր բին Համադ ալ Բուսաիդի հետ։
Ես ժնևում եմ՝ արդար և հավասար համաձայնության հասնելու իրական գաղափարներով։ Ինչը սեղանին չէ՝ հնազանդությունը սպառնալիքներից առաջ», – գրել է Արաղչին X-ում։
Փետրվարի սկզբին Իրանը և ԱՄՆ-ն վերսկսել էին բանակցությունները՝ Թեհրանի միջուկային ծրագրի շուրջ տասնամյակներ շարունակվող վեճը լուծելու և նոր ռազմական բախումը կանխելու նպատակով։
Թեպետ Վաշինգտոնը ձգտում է ընդլայնել բանակցությունների շրջանակը՝ ներառելով նաև ոչ միջուկային հարցեր, ինչպես օրինակ՝ Իրանի հրթիռային պաշարների հարցը, սակայն Թեհրանը հայտարարում է, որ պատրաստ է քննարկել իր միջուկային ծրագրի սահմանափակումները միայն պատժամիջոցների մեղմացման դիմաց։
Իրանը բազմիցս հայտարարել է, որ իր միջուկային ծրագիրը բացառապես քաղաքացիական նպատակներով է։ Պաշտոնական Թեհրանը պատրաստակամություն է հայտնել մեղմել միջուկային զենքի վերաբերյալ առկա մտահոգությունները՝ «կառուցելով վստահություն, որ հարստացումը խաղաղ նպատակներով է և այդպես էլ կմնա»։
