Այլ երկրներ կարող են միանալ Մեքքայի համաձայնագրին, որի մասնակիցներն են Պակիստանը, Սաուդյան Արաբիան և Թուրքիան. Պակիստանի ԶՈւ ներկայացուցիչ
Այլ երկրներ կարող են միանալ Մեքքայի համաձայնագրին, որի մասնակիցներն են Պակիստանը, Սաուդյան Արաբիան և Թուրքիան, եթե հավատում են Ասիական տարածաշրջանում խաղաղության արժեքներին և կիսում են չմիջամտության ու զսպման արժեքները։ Այս մասին հայտարարել է Պակիստանի զինված ուժերի Հասարակայնության հետ կապերի միջգերատեսչական ծառայության գլխավոր տնօրեն Ահմեդ Շարիֆ Չոուդրին, հայտնում է ՏԱՍՍ-ը:
«Այս համաձայնագիրը, այս դաշինքը կարող է ներառել նոր և համագործակցել ցանկացող գործընկերների, ովքեր նույնպես հավատում են տարածաշրջանում խաղաղությանը, կայունությանը և անվտանգությանը, ինչպես նաև կիսում են չհարձակման, չմիջամտության և հավաքական զսպման ընդհանուր տեսլականը»,– Al Arabiya հեռուստաալիքին տված հարցազրույցում ասել է պակիստանցի գեներալը։
Չոուդրին նշել է, որ ձևաչափը չպետք է դիտարկել որպես բացառապես մուսուլմանական երկրներից բաղկացած ակումբ: Դրա ընդլայնման մասին որոշումը պետք է կայացնեն մասնակից երկրները, հավելել է նա։ Գեներալն ընդգծել է, որ պակտը կրում է պաշտպանական բնույթ և ուղղված է հավաքական զսպմանը, բացի այդ, դրանում չկա որևէ ագրեսիվ բան և չկան որևէ տարածաշրջանային հավակնություններ:
«Այսպիսով, փոխադարձ պաշտպանության այս համաձայնագիրն ստացել է հավելյալ բնույթ: Այն չի խոչընդոտում մասնակից երկրների որևէ այլ հարաբերության»,- նշել է Չոուդրին։
Ավելի վաղ Պակիստանի ԱԳՆ մամուլի քարտուղարը հայտարարել էր, որ այս փուլում Մեքքայի համաձայնագրի ընդլայնման հարցը չի քննարկվում։
Հիշեցնենք, որ օգոստոսի 7-ին Սաուդյան Արաբիայի թագաժառանգ Մուհամմադ բեն Սալման Ալ Սաուդը, Թուրքիայի նախագահ Թայիփ Էրդողանը և Պակիստանի վարչապետ Շահբազ Շարիֆը ստորագրել են Մեքքայի համաձայնագիրը: Այն նախատեսում է, որ հարձակումը երկրներից որևէ մեկի վրա կդիտարկվի որպես ագրեսիա պակտի բոլոր մասնակիցների դեմ:
