Ամանորյա ուտելի նվերներ. փորձում ենք լավագույն բաղադրատոմսը
Ամանորյա ուտելի նվերը թանկարժեք չէ նվիրողի համար, բայց հուզիչ՝ ստացողի համար: Նման նվերը, անշուշտ, կլինի անմոռանալի հիշողություն: Lenta.ru-ն ներկայացնում է կոճապղպեղային թխվածքաբլիթների պատրաստման քայլ առ քայլ բաղադրատոմսերը:
Բաղադրիչները
- Ցորենի ալյուր – 500 գրամ
- Կարագ – 200 գրամ
- Շաքարավազ – 200 գրամ
- Մեղր – 100 գրամ
- Հավկիթ – 1
- Աղացած կոճապղպեղ – 2 թեյի գդալ
- Աղացած դարչին – 1 թեյի գդալ
- Աղացած մեխակ – 1/2 թեյի գդալ
- Աղացած հիլ – 1/2 թեյի գդալ
- Սոդա – 1 թեյի գդալ
- Աղ – 1/4 թեյի գդալ
- Փխրեցուցիչ – 1 թեյի գդալ
- Նարնջի կեղև – 1 ճաշի գդալ
- Շաքարի փոշի – 200 գրամ
- Ձվի սպիտակուց – 1 հատ
- Կիտրոնի հյութ – 1 ճաշի գդալ
Պատրաստման եղանակը
1. Պատրաստելուց մի քանի ժամ առաջ կարագը հանել սառնարանից:
2. Ալյուրը մաղել խորը ամանի մեջ, ավելացնել սոդան, փխրեցուցիչը, աղը և բոլոր համեմունքները:
3. Առանձին մեծ ամանի մեջ միջին արագությամբ մոտ երեք-չորս րոպե հարել փափուկ կարագը և շաքարավազը:
4. Սենյակային ջերմաստիճանի ձուն ավելացնել կարագի խառնուրդին և շարունակել հարել միջին արագությամբ: Այնուհետև ամանի մեջ լցնել մեղրը և նարնջի կեղևը:
5. Աստիճանաբար լցնել չոր բաղադրիչները՝ սկզբում խառնելով ցածր արագությամբ, ապա, երբ խմորը խտանա, հունցել ձեռքերով։
6. Խմորը գնդել, փաթաթել այն սննդային թաղանթով և դնել սառնարանում առնվազն երկու ժամ, իսկ ավելի լավ է՝ ամբողջ գիշեր:
7. Խմորը հանել սառնարանից և թողնել սենյակային ջերմաստիճանում 15-20 րոպե, նախքան այն գրտնակելը:
8. Ջեռոցը նախապես տաքացնել մինչև 180 աստիճան և թխման տապակը պատել յուղաթղթով։
9. Ալյուրով պատված մակերեսի վրա խմորը գրտնակել հինգից յոթ միլիմետր հաստությամբ։
10. Հատուկ կաղապարների միջոցով թխվածքաբլիթներ կտրել խմորից և շարել տապակի վրա:
11. Թխել թխվածքաբլիթները 10-12 րոպե, մինչև ոսկեգույն դառնան։
12. Հանել տապակը ջեռոցից, թխվածքաբլիթները մեկ շերտով տեղափոխել մետաղական ցանցի կամ ափսեի վրա:
13. Ջնարակը պատրաստելու համար ձվի սպիտակուցը հարել կիտրոնի հյութի հետ, աստիճանաբար ավելացնել շաքարի փոշի: Պետք է ստացվի չհոսող զանգված:
14. Ջնարակը տեղափոխել հրուշակագործական տոպրակի մեջ և զարդարել ամբողջությամբ սառած թխվածքաբլիթները։
