Աննա Վարդապետյանին Էստոնիայի և Լատվիայի գլխավոր դատախազները մետաղադրամներ են նվիրել
Կոռուպցիայի կանխարգելման հանձնաժողովի պաշտոնական կայքում հուլիսի 7-ին տեղ գտած ձևաթղթերից տեղեկանում ենք՝ ՀՀ գլխավոր դատախազ Աննա Վարդապետյանը 2026 թվականի հունիսին պաշտոնական այցերի շրջանակում նվերներ է ստացել Էստոնիայի և Լատվիայի Հանրապետության գլխավոր դատախազներից՝ 120 հազար դրամ ընդհանուր արժեքով։
Այսպես, Աննա Վարդապետյանը ԿԿՀ ձևաթղթում նշել է Էստոնիայի Հանրապետության գլխավոր դատախազ Աստրիդ Ասիից ստացած նվերի մասին, որը Էստոնիայի Հանրապետության գլխավոր դատախազությունը խորհրդանշող հուշանվեր-մետաղադրամ է։ Նվեր ստացողի կողմից գնահատված արժեքը նշվել է 60 հազար դրամ։
Մեկ այլ ձևաթղթով էլ գլխավոր դատախազը նշել է Լատվիայի Հանրապետության գլխավոր դատախազ Արմինս Մեյստրեսից ստացած նվերի մասին։ Այն Լատվիայի Հանրապետության գլխավոր դատախազությունը խորհրդանշող հուշանվեր-մետաղադրամ, նկար և մետաղադրամների հավաքածու է, որը ևս գնահատվել է 60 հազար դրամ։
«Հանրային ծառայության մասին» օրենքի համաձայն՝ պաշտոնյաների՝ 60.000 դրամը գերազանցող արարողակարգային կամ գործուղման նվերները փոխանցվում են պետությանը կամ համայնքին: Բացառություններ՝ մինչև 60.000 դրամ արժողությամբ արարողակարգային նվերները կարող են մնալ ծառայողին, եթե չկա շահերի բախում:
