Պուտինի այցը Չինաստան վերածվեց իսկական դիվանագիտական մարաթոնի. ТАСС
Ավարտվեց Ռուսաստանի նախագահ Վլադիմիր Պուտինի չորս օր տևած աննախադեպ տևական այցը Չինաստան։ Այս օրերը Ռուսաստանի առաջնորդի համար իսկական դիվանագիտական մարաթոնի վերածվեցին, գրում է ТАСС-ը։
Նա լիարժեք շփումներ ունեցավ 17 երկրների ղեկավարների և վարչապետների հետ։ Իսկ աշխատանքային ժամերի առումով Պուտինը խախտեց բոլոր ընդունված աշխատանքային նորմերը՝ աշխատելով ընդհանուր առմամբ 48 ժամ։
Եթե օգոստոսի 31-ը կարելի է համարել մարաթոնից առաջ տաքացում՝ նախագահի հանրային միջոցառումները տևեցին մոտ 3,5 ժամ, ապա, օրինակ, սեպտեմբերի 1-ին՝ Շանհայի համագործակցության կազմակերպության (ՇՀԿ) գագաթնաժողովի օրը, Պուտինի աշխատանքային օրը ձգվեց երկար՝ 16 ժամ։ Նախագահի ժամանկացույցը սեպտեմբերի 2-ին ոչ պակաս հագեցած էր և նույնպես գերազանցում էր 14 աշխատանքային ժամը։ Սեպտեմբերի 3-ին Պուտինն անսովոր շուտ սկսեց աշխատանքը։ Առավոտյան արդեն իններորդ ժամի սկզբին նա միացավ Ճապոնիայի դեմ Դիմադրության պատերազմում չին ժողովրդի հաղթանակի 80-ամյակի և Երկրորդ համաշխարհային պատերազմի ավարտի կապակցությամբ կազմակերպված հանդիսավոր միջոցառումներին հրավիրված առաջնորդներին։ Աշխատանքն ավարտվեց Կրեմլի press pul-ի լրագրողների հետ ժամը 22:30-ին զրույցով։
Այցի օրերին իմաստային ծանրաբեռնվածությունը ևս աննախադեպ էր։ Պուտինն ուշադրություն դարձրեց համաշխարհային քաղաքականության գրեթե բոլոր վեկտորներին։ Անհրաժեշտ էր քննարկել ոչ միայն Շանհայի համագործակցության կազմակերպության օրակարգը և ռուս-չինական հարաբերությունների զարգացումը։ Ուկրաինայի հակամարտության կարգավորումը, իրանական միջուկային ծրագիրը, Մերձավոր Արևելքի և Անդրկովկասի իրավիճակը մշտապես օրակարգում էին Պուտինի Հնդկաստանից, Թուրքիայից, Իրանից և այլ երկրներից գործընկերների հետ բանակցությունների ժամանակ։
Նախագահը լիարժեք բանակցություններ է վարել Չինաստանի նախագահ Սի Ծինպինի, Հայաստանի վարչապետ Նիկոլ Փաշինյանի, Հնդկաստանի վարչապետ Նարենդրա Մոդիի, Թուրքիայի նախագահ Ռեջեփ Թայիփ Էրդողանի, Վիետնամի վարչապետ Ֆամ Մին Չինի, Տաջիկստանի նախագահ Էմոմալի Ռահմոնի, Իրանի նախագահ Մասուդ Փեզեշքիանի, Նեպալի վարչապետ Շարմա Օլիի, Սլովակիայի վարչապետ Ռոբերտ Ֆիցոյի, Պակիստանի վարչապետ Շահբազ Շարիֆի, Սերբիայի նախագահ Ալեքսանդր Վուչիչի, Ուզբեկստանի նախագահ Շավքաթ Միրզիյոևի, Բելառուսի նախագահ Ալեքսանդր Լուկաշենկոյի, Կոնգոյի նախագահ Դենիս Սասու Նգուեսոյի և Վիետնամի նախագահ Լուոնգ Ծյունգի հետ։ Հյուսիսային Կորեայի նախագահ Կիմ Չեն Ընի հետ բանակցությունները երկրորդ ամենաերկարն էին՝ զիջելով միայն հյուրընկալող Չինաստանին։ Ռուսաստանի, Չինաստանի և Մոնղոլիայի եռակողմ գագաթնաժողովի ձևաչափով Պուտինը զրուցել է Մոնղոլիայի նախագահ Ուխնաագին Խուրելսուխի հետ։
ՇՀԿ միջոցառումների շրջանակում և Ճապոնիայի դեմ դիմադրության պատերազմում չին ժողովրդի հաղթանակի 80-ամյակի և Երկրորդ համաշխարհային պատերազմի ավարտի տոնակատարությունների ժամանակ շփումները ոչ պակաս ինտենսիվ էին։ Ինչպես ասում են դիվանագիտական լեզվով, Պուտինը կարողացավ շատ գործընկերների հետ խոսել «ոտքի վրա»։ Հետագայում նրանցից շատերի հետ տեղի ունեցան լիարժեք հանդիպումներ։ Սակայն նման կարճատև շփումների շարքում կարելի է նշել Ինդոնեզիայի ղեկավար Պրաբովո Սուբիանտոյի հետ շփումը, Թուրքիայի արտգործնախարար Հաքան Ֆիդանի հետ զրույցը, ինչպես նաև խորհրդային մարշալների ժառանգների հետ զրույցը։
Չինաստան կատարած այս աննախադեպ մեծածավալ այցի ավարտին Պուտինը ժամանակ գտավ նաև Կրեմլի press pul-ի հետ զրուցելու համար։ Նախագահը պատասխանեց հարցերին ամբողջ 50 րոպե։
