«Ոմն Ալի Մուսաբեկով Կոռնիձորի կամրջից պիտի հանգիստ գնա Ադրբեջան, ՀՀ քաղաքացին էլ՝ Երասխով դեպի Մեղրի». Նիկոլ Փաշինյան

Ամերիկայի Միացյալ Նահանգներում գտնվող Նիկոլ Փաշինյանը լրագրողների հետ զրույցում խոսելով Ադրբեջանի հետ կապուղիների բացման և դրանց անխոչընդոտ անցման մասին, նշեց, որ փաստաթղթերով այդ խոչընդոտներն այսօր վերացնում են։

«Իսկ խոչընդոտը հետևյալն է՝ եկեք պատկերացնենք այսպիսի իրավիճակ, երբ Ադրբեջանի քաղաքացին, անունը պայմանական ասենք՝ Ալի Մուսաբեկովն իր անձնագրով գալիս է Կոռնիձորի կամրջի մոտ, ասում է՝ գիտե՞ք ինչ, ես, օրինակ, ուզում եմ գնալ Նախիջևան, ես հարգում եմ Հայաստանի ինքնիշխանությունը, իրավազորությունը, պատրաստ եմ վճարումներ անել, ինչ որ սահմանված է, անձնագրային ու մաքսային հսկողություն անցնեմ։ Բայց մենք ասում ենք՝ ոչ, մենք թույլ չենք տալիս, սա է խոչընդոտը։

Նույնն էլ, ենթադրենք՝ ՀՀ քաղաքացի Հայկ Ասատրյանը, օրինակ, գնում է Երասխ, ասում է՝ գիտե՞ք ինչ, ուզում եմ այստեղով գնամ Մեղրի, Ադրբեջանն ասում է՝ ոչ, սա է խոչընդոտը»,- նշեց Նիկոլ Փաշինյանը։

Ըստ Նիկոլ Փաշինյանի, միջազգային պրակտիկան ուսումնասիրել են, բազմաթիվ պայմանագրերում, այդ թվում՝ Հայաստանի կողմից ստորագրված, «ենթադրում եմ՝ Ադրբեջանի կողմից ստորագրված, կան իրավապայմանագրային պայմանագրեր՝ անարգել անցումներն ապահովելու պարտավորության մասին, և բոլոր այդ դեպքերում, դա նշանակում է, իհարկե. իրավազորության, ինքնիշխանության, տարածքային ամբողջականության հարգմամբ»։

«Մեկնաբանություններ կարդացի, որ մենք Ադրբեջանի համար բացում ենք ճանապարհը, Ադրբեջանը չի բացում, իհարկե, սա անլուրջ խոսակցություն է, որովհետև այս ամենն իմաստ կունենար այդ պարագայում։ Եթե մենք համաձայն լինեինք նման լուծումների, վաղուց կգնայինք այդ լուծումներին»,- շեշտեց Նիկոլ Փաշինյանը։

Հիշեցնենք, որ երեկ Նիկոլ Փաշինյանը հայտարարել է, որ Վաշինգտոնում Հայաստանի, Ադրբեջանի և Ամերիկայի Միացյալ Նահանգների ստորագրած հռչակագրով Հայաստանն ու Ադրբեջանը նախաստորագրել են խաղաղության համաձայնագիրը։

Սպիտակ տանը ԱՄՆ նախագահ Դոնալդ Թրամփի և Ադրբեջանի նախագահ Իլհամ Ալիևի հետ եռակողմ հանդիպումից հետո լրագրողների հետ զրույցում Նիկոլ Փաշինյանը շեշտել է, որ խաղաղության համաձայնագրի նախաստորագրումն առանցքային իրադարձություն է և շատ էական քայլ դեպի վերջնական ստորագրում և վավերացում։

«Ընդհանրապես հռչակագիրը նրա մասին է, որ Հայաստանի և Ադրբեջանի միջև հաստատվում է խաղաղություն։ Հռչակագրում հստակ գրված է, որ մենք փակում ենք թշնամանքի էջը, բացառում ենք ուժի կիրառումը և հարաբերությունները կառուցում ենք ՄԱԿ-ի կանոնադրության, Ալմաթիի հռչակագրի հիման վրա, ինչը նշանակում է, որ Խորհրդային Հայաստանի տարածքը ճշգրիտ նույնական է Հայաստանի Հանրապետության տարածքի հետ, Խորհրդային Ադրբեջանի տարածքը ճշգրիտ նույնական է Ադրբեջանի Հանրապետության տարածքի հետ։ Մենք փոխադարձաբար ճանաչում ենք միմյանց անկախությունը, ինքնիշխանությունը, տարածքային ամբողջականությունը, սահմանների անխախտելիությունը, և հաստատվում է խաղաղություն»,- ասել է Փաշինյանը։

Մանրամասները՝ 168.am-ի տեսանյութում