«Ադրբեջանը պատրաստ է աջակցել ՀԿԹՀ-ի անկախությանը». Ալիև
Ադրբեջանի նախագահ Իլհամ Ալիևը հայտարարել է, որ իր երկիրը պատրաստ է լիարժեք աջակցություն ցուցաբերել Կիպրոսի հյուսիսային թուրքական հատվածի՝ որպես անկախ պետություն միջազգային ճանաչմանը։
Բաքվում ընթացող «Դեպի նոր աշխարհակարգ» խորագրով քաղաքական ֆորումի ընթացքում Ալիևը հիշեցրել է, որ Ադրբեջանը կարևոր դեր է խաղացել Կիպրոսի Հյուսիսային թուրքական ինքնահռչակ հանրապետության՝ Թյուրքական պետությունների կազմակերպությունում դիտորդի կարգավիճակ ստանալու գործում։
«Մեր քաղաքականությունը հստակ է։ Մենք միշտ եղբայրական ժողովրդի կողքին ենք եղել և այդպես էլ շարունակելու ենք։ Մեր նպատակն է աջակցել նրանց՝ պահպանելու և ամրապնդելու իրենց պետականությունը»,- նշել է Ալիևը։
Նա նաև քննադատել է միջազգային հանրության երկակի ստանդարտները՝ հիշեցնելով, որ Կիպրոսի հույները մերժել էին ՄԱԿ-ի առաջարկած միավորման հանրաքվեն, մինչդեռ թուրքական կողմը՝ ընդունել։ «Ի՞նչ եղավ հետո։ Հունական կողմը միացավ ԵՄ-ին։ Սա արդար չէ։ Սա բացահայտ երկակի ստանդարտների օրինակ է», – ասել է Ադրբեջանի ղեկավարը։
