Ակնկալում ենք, որ Հայաստանը Սահմանադրության փոփոխությամբ կհրաժարվի Ադրբեջանի նկատմամբ տարածքային պահանջներից․ Ադրբեջանի փոխարտգործնախարար
Ակնկալում ենք, որ Հայաստանը Սահմանադրության փոփոխությամբ կհրաժարվի Ադրբեջանի նկատմամբ տարածքային պահանջներից։ Այս մասին ՄԱԿ մարդու իրավունքների խորհրդի 58-րդ նստաշրջանի բարձրաստիճան հատվածում իր ելույթում նշել է Ադրբեջանի փոխարտգործնախարար Էլնուր Մամեդովը։
«Այս պահին մենք ակնկալում ենք, որ Հայաստանը կհաղթահարի կարգավորման գործընթացի հիմնական խոչընդոտը՝ Սահմանադրության փոփոխությունների միջոցով օրինական կերպով հրաժարվելով Ադրբեջանի նկատմամբ տարածքային պահանջներից։ Հետպատերազմյան վերականգնումը պահանջում է վերացնել հակամարտության բոլոր բացասական հետևանքները, ներառյալ հանցագործությունների կատարման մեջ կասկածվողներին պատասխանատվության ենթարկելը: Պատերազմական հանցագործությունների մեջ կասկածվողներին պատասխանատվության ենթարկելը ոչ միայն Ադրբեջանի իրավունքն է, այլ նաև միջազգային իրավունքի պարտավորությունը։ Մենք երաշխավորել ենք, որ մեղադրյալի բոլոր դատավարական իրավունքները հարգվեն միջազգային չափանիշներին համապատասխան և կշարունակենք դա անել»,- ասել է Մամեդովը:
Նա նաև նշել է, որ վերջին մեկ տարվա ընթացքում Ադրբեջանն ու Հայաստանն ուղիղ երկկողմ բանակցությունների միջոցով զգալի առաջընթաց են գրանցել կարգավորման գործընթացում, մասնավորապես՝ երկկողմ խաղաղության համաձայնագրի նախապատրաստման, պետական սահմանի սահմանազատման և սահմանազատման ուղղությամբ։
