Սոխով տոլմա
Բաղադրիչները՝
- 6 շատ մեծ գլուխ սոխ
- 1 ոչ մեծ գլուխ սպիտակ սոխ
- 300 գ հորթի մսի խճողակ
- 300 գ խոզի մսի խճողակ
- 1/2 բաժակ բրինձ
- 150-200 գ ձիթապտղի ձեթ
- աղ, աղացած սև պղպեղ
- աղացած դարչին՝ մատուցելու համար
Պատրաստման եղանակը
Բրինձը 1 ժամով թողեք սառը ջրի մեջ, ապա ջուրը քամեք:
6 մեծ գլուխ սոխերը մաքրեք կեղևից: Սոխերի վրա վերևից դանակով ուղղահայաց կտրվածք արեք, որպեսզի հետո առանց դժվարության շերտերի բաժանեք, ապա 10 րոպեով տեղադրեք եռացող ջրի մեջ: Հետո հանեք ջրից, թողեք հովանան:
Սպիտակ փոքր սոխը մաքրեք, շատ մանր կտրտեք: Հորթի ու խոզի մսի խճողակները խառնեք բրնձի ու կտրտած սոխի հետ, աղ ու պղպեղ արեք:
Առանձնացրեք եփած սոխերի ամենալայն ու մեծ շերտերը, վրան 1,5 ճ/գ խճողակ լցրեք ու փաթաթեք:
Սոխով տոլմաները շրջանաձև շարեք լայն ու ոչ շատ խորը կաթսայի մեջ, վրան լցրեք ձիթապտղի ձեթը, ապա վրան ծանր աման դրեք, որպեսզի եփելիս տոլմաները չբացվեն: Վրան տաք ջուր լցրեք այնքան, որպեսզի տոլմաներն ամբողջությամբ չծածկվեն: 30-40 րոպե մարմանդ կրակի վրա եփեք, ապա կաթսան վերցրեք կրակից, թողեք մի քիչ հովանա:
Հովացած սոխի տոլմաները տեղադրեք մեծ ափսեի մեջ, վրան աղացած դարչին ցանեք ու մատուցեք:
Խորհուրդ: Մեծ սոխերի մնացած փոքրիկ շերտերը կարող եք աղ ու պղպեղով, չորացրած բույսերով և ձեր ճաշակով այլ համեմունքներով համեմել, վրան ձիթապտղի ձեթ լցնել, փաթաթել փայլաթիթեղի մեջ ու մոտ 30 րոպե տապակել 180 աստիճան ցելսիուս ջերմաստիճանի ջեռոցում: Խճողակի մեջ խոզի ու հորթի միսը կարող եք փոխարինել ոչխարի մսով:
