Իսրայելի ԱԳ նախարարը շնորհավորել է Թուրքիայի ընդդիմադիր թեկնածուներին ընտրություններում հաղթելու առթիվ
Մարտի 31-ին Թուրքիայի տեղական ինքնակառավարման մարմինների (ՏԻՄ) ընտրությունների ավարտից հետո մեկնարկած և դեռևս անավարտ հաշվարկների հիման վրա Իսրայելի արտգործնախարար Իսրայել Կացը Թուրքիայի ընդդիմությանը շնորհավորել է հաղթանակի առթիվ: Այս մասին տեղեկացնում է ermenihaber.am-ը։
Կացը, շնորհավորելով Թուրքիայում գլխավոր ընդդիմադիր ուժը համարվող «Ժողովրդահանրապետական» կուսակցության (ԺՀԿ-CHP) Ստամբուլի քաղաքապետի թեկնածու Էքրեմ Իմամօղլուին և Անկարայի քաղաքապետի թեկնածու Մանսուր Յավաշին, ասել է.
«Սա նախագահ Էրդողանին ուղղված ակնհայտ ուղերձ է: Իսրայելի վրա հարձակումն արդեն չի աշխատում, նա պետք է նոր բաներ գտնի»:
Թուրքական մամուլում Թուրքիայի նախագահ Ռեջեփ Թայիփ Էրդողանին ուղղված Կացի խոսքերը որակվել են սկանդալային:
