Ամրագոտու կիրառման կանոններին չհետևողները պատասխանատվության կենթարկվեն. Ոստիկանություն
Հայաստանի Հանրապետության ոստիկանությունը հորդորում է անվերապահորեն հետևել ամրագոտու կիրառման կանոններին: Ոստիկանության տարածած հաղորդագրության մեջ նշված է, որ եթե վարորդները չհետևեն ամրագոտու կիրառման կանոններին, իրավախախտումը հայտնաբերելու համար կօգտագործվեն նաև տեսահսկող սարքեր:
«Վիճակագրությունը ցույց է տալիս, որ արագության գերազանցումը մահվան ելքով ավտովթարների պատճառներից ամենատարածվածն է: Սակայն կա նաև վիճակագրություն, որ նույնիսկ արագության գերազանցման դեպքում վթարների հետևանքները մեղմվում են, եթե վարորդն ու ուղևորներն ամրակապված են:
Եթե մոտ ապագայում իրավիճակը չփոխվի, իրավախախտումը հայտնաբերելու համար կօգտագործվեն նաև տեսահսկող սարքերը՝ ապահովելով բոլոր իրավախախտների պատասխանատվության անխուսափելիությունը»,- հայտնում են Ոստիկանությունից՝ ընդգծելով, որ Ոստիկանության խնդիրը ոչ թե մարդկանց տուգանելն է, այլ երթևեկության անվտանգության ապահովումը:
