Սա հատուկ էր արված, որպեսզի ԼՂ հարցը, որպես մահակ միշտ հնարավոր լինի պահել Հայաստանի գլխին. Փաշինյան
44-օրյա պատերազմից հետո եւ նույնիսկ դրանից առաջ մեզ մեղադրում էին վաճառելու, ծախելու մեջ, հանձնելու մեջ, այսինքն ջանքեր չենք գործադրել, որպեսզի Հայաստանի կամ ԼՂ իրավունքները պաշտպանենք. Մինչդեռ եթե մեզ օբյեկտիվ մեղադրանք լինի, պետք է լինի ուրիշ բանի մասին, որ մենք ժողովրդի հետ չենք խոսել ԼՂ հարցում հայկական պատկերացումների եւ ցանկությունների իրականացման անհնարինության մասին: Այս մասին, այսօր՝ դեկտեմբերի 19-ին, Հանրային հեռուստատեսությանը տված հարցազրույցում նշեց Նիկոլ Փաշինյանը:
«Մեզ մեղադրում են մի բանում, որում մենք մեղավոր չենք, մեզ չեն մեղադրում մի բանում, որտեղ ավելի հավանական է, որ մեր մեղավորությունը կհիմնավորվի: Սա էլ պատճառ ունի: Չեն մեղադրում, որովհետեւ այս պարագայում մեղադրանքն ավելի կլղոզվի շատ ավելի մեծ շրջանակների հասցեատեր դարձնելով: Այսինքն կդառնա այնպես, որ մեղադրանքը հասցեականացնելը, անձնավորելը շատ ավելի բարդ է»,-ասաց նա:
Փաշինյանի խոսքով, ցանկացած իշխանություն որպեսզի ասի՝ այսինչ բանը չլինող է, պետք է դրան հաջորդի առաջարկ. «Հետեւաբար, ի՞նչ անենք մեք: Այս «հետեւաբար»-ի սոցիալ-հոգեբանական, ենթագիտակցական անհնարինություն է, որ մեզ դրել է այս վիճակի առաջ: Այդ անհնարինությունը նրա մասին չէ, որ նեգատիվ պրոցեսներ կսկսվեն Հայաստանում, անկայունություն կլինի: Սա չի խնդիրը, խնդիրն այն է, որ անձամբ ես, իշխանության ներկայացուցիչները, ՀՀ հազարավոր քաղաքացիներ խնդիր են ունեցել այդ ամենի ինչի հետ համակերպվելու հետ: Այնպես չէ, որ մենք ներքուստ հաշտվել ենք դրա հետ ու թաքցրել ենք հանրությունից: Ես ինքս չեմ հաշտվել դրա հետ, որովհետեւ դրա այլընտրանքը չի եղել: Հիմա պատկերացրեք, ասում ենք՝ սա է իրավիճակը, ժողովուրդ: Բայց առաջնորդի խնդիրն է առաջարկ ներկայացնելը: Ի՞նչ ենք անում, վերադարձնում ենք տարածքները, ԼՂ-ի ընթացիկ կարգավիճակը զրոյացնում ենք, ԼՂ ապագա կարգավիճակի վերաբերյալ ոչ մի որոշակիություն չկա, ավելին, որոշակի է այն, ինչն ընդունվել է միջազգային ամենաբարձր ատյաններում:
Այսինքն, ըստ էության, եթե ելնենք իմաստուն քաղաքական գործչի տրամաբանությամբ, 2019-ին արդեն իմաստուն քաղաքական գործչի արձանագրումը պետք է լիներ դա, որ 7 տարածքները պետք է հանձնել, ԼՂ ընթացիկ կարգավիճակը զրոյացնել, թե ինչու եւ ինչպես, հետագայում կասեմ: ԼՂ-ում պետք է հաստատվի մաքսիմում հայ-ադրբեջանական համատեղ կառավարում, եւ ԼՂ կարգավիճակի որոշակիացում չի լինելու այնքան ժամանակ, մինչեւ ադրբեջանցիները ԼՂ-ում լինեն մեծամասնություն»,- ընդգծեց Փաշինյանը:
Նա հավելեց, որ այս ամենից հետո գալիս է նաեւ 5-րդ հարցը. «Իսկ այս ամենից հետո ի՞նչ է լինելու: Օրինակ, Սեւ լճի իրադարձությունները լինելու են, թե ոչ, Սոթք-Խոզնավարի իրադարձությունները, Տեղի իրադարձությունները լինելո՞ւ են, թե ոչ: Հաջորդը, ըստ էության, պետք է առերեսվել 30 տարվա հայկական խոսույթը փլուզելու անհրաժեշտության առաջ եւ այդպես էլ չունենալով հարցի պատասխանը՝ այսպես ստացվեց, որովհետեւ հայկական իշխանությունը փլուզե՞ց հայկական տեսլականը, թե՞ ընդհակառակը, պետք է այդպես ստացվեր: Երբ ես ասացի ԱԺ-ում, որ կունենայինք նույնը, բայց առանց զոհերի, այդպես էլ չհասկացա՝ ինչու աղմուկ բարձրացավ, որովհետեւ ես սա նկատի ունեի»,- ընդգծեց նա:
Նիկոլ Փաշինյանը հայտարարեց, որ ԼՂ խնդրի կարգավորման բանակցային գործընթացում երբեք չի եղել մի տարբերակ, որն առաջարկի ԼՂ խնդրի լուծում. «Բոլոր տարբերակները, որոնք եղել են սեղանի վրա, մադրիդյան սկզբունքներից ի վեր, ենթադրել են ԼՂ հարցի չլուծում: Միայն մի տարբերակ է եղել 1999-ին, որը ստորագրելու պարագայում կարելի էր ասել, որ ԼՂ հարցը լուծվել է. դա Մեղրիի եւ ԼՂ-ի փոխանակման տարբերակն էր: Այսինքն Մեղրին հանձնվում է Ադրբեջանին, ԼՂ-ն միացվում է Հայաստանին: Մնացած ոչ մի տարբերակով ԼՂ հարցի լուծում չկար: Դա հատուկ էր արված, որ ԼՂ հարցը որպես պահակ հնարավոր լինի պահել Հայաստանի գլխին: Գուցե նաեւ Ադրբեջանի գլխին»,-ասաց նա:
«Եվ սա, իմ ընկալմամբ, ինչ-որ առումով նաև հատուկ էր արված, որպեսզի ԼՂ հարցը, որպես մահակ միշտ հնարավոր լինի պահել Հայաստանի Հանրապետության գլխին: Չգիտեմ, գուցե, ոմանք մտածում էին նաև` Ադրբեջանի գլխին, բայց ես հիմա Հայաստանի մասին եմ խոսում և Հայաստանի մասին եմ ուզում խոսել: Ես նախկինում էլ ասել եմ՝ անհնարինությունը պարզաբանելու, որտեղ է կանգնելու պրոցեսը, որովհետև եթե դու ունես կանխատեսելի միջավայր կամ հնարավորություն պրոցեսը դարձնել կանխատեսելի, դու կարող ես քննարկել և որոշում կայացնել, իսկ եթե դու չգիտես կամ բացարձակապես հնարավորություն չկա պրոցեսը դարձնել կանխատեսելի, Ձեր ասածը դառնում է գործնականում անհնար»,- ընդգծեց Փաշինյանը:
