Կատարը կմասնակցի հունիսի 19-ին ԱՄՆ-ի և Իրանի միջև հուշագրի պաշտոնական ստորագրմանը
Կատարի արտաքին գործերի նախարարության խոսնակ Մաջիդ ալ-Անսարին հունիսի 16-ին Դոհայում լրագրողների հետ զրույցում լավատեսություն է հայտնել, որ Իրանի և ԱՄՆ-ի միջև բանակցությունները վերջ կդնեն հակամարտությանը և թույլ կտան հասնել կայունության։ Այս մասին հաղորդում է Al Jazeera-ն։
Մաջիդ ալ-Անսարին նաև հույս է հայտնել, որ հունիսի 19-ի հուշագրի ստորագրումը կլինի արդյունավետ բանակցությունների սկիզբ։
«Կատարը մասնակցել է Պակիստանի գլխավորած միջնորդական խմբին ճգնաժամի կարգավորման ջանքերի շրջանակներում։ Կատարն անմիջական միջնորդ չէ, այլ կողմ է, որն աջակցում է Պակիստանի միջնորդությանը և գործում է դրա շրջանակներում»,- նշել է ալ-Անսարին։
Նրա խոսքով՝ բոլոր ջանքերը հիմնականում կենտրոնացած են եղել նավագնացության անվտանգության և տարածաշրջանի կայունության ապահովման վրա։
«Իսրայելի կողմից Լիբանանի վրա հարձակումները որևէ արդարացում չունեն, Կատարը դրանք համարում է ինքնիշխանության խախտում», – հավելել է նա։
Խոսնակը նաև հույս է հայտնել, որ ԱՄՆ-Իրան համաձայնագիրը կվերականգնի հեղուկ բնական գազի (ՀԲԳ) մատակարարումը դեպի կարիքավոր երկրներ։
«Մենք հույս ունենք, որ հուշագիրը կօգնի վերսկսել նավագնացությունը Հորմուզում, որպեսզի Կատարը կարողանա շարունակել ՀԲԳ-ի մատակարարումը»,- ասել է նա մամուլի ասուլիսում։
Ալ-Անսարին նշել է, որ Կատարը ներկայացված կլինի Ժնևում հունիսի 19-ին Իրանի և Միացյալ Նահանգների միջև փոխըմբռնման հուշագրի պաշտոնական ստորագրմանը։
Խոսնակը նաև շեշտել է, որ ԱՄՆ-ի և Իրանի միջև այժմ քննարկվող հիմնական վիճելի կետերից են չհարձակման մասին պայմանագիրը, ոչ պետական զինված խմբավորումները և միջուկային հարցը։
«Մենք այժմ ճիշտ ուղու վրա ենք տարածաշրջանային անվտանգության հարցում։ Ակնհայտ է, որ առջևում շատ մարտահրավերներ են սպասվում, բայց եկեք սա օգտագործենք որպես լավատեսություն վայելելու պահ», – ասել է ալ-Անսարին։
Հունիսի 19-ին փոխըմբռնման հուշագրի ստորագրումից հետո Իրանն ու ԱՄՆ-ն 60 օրվա ընթացքում բանակցություններ կվարեն վերջնական համաձայնագրի կնքման ուղղությամբ։
