Քաղաքական անմեղսունակները դատարկեցին Արցախը և զբաղվում են արդեն Հայաստանի հարցով․ Վարդան Օսկանյան
Այս իշխանությունները իրենց գործունեության այս մի քանի տարիների արդյունքում հասցրեցին Արցախը դատարկել ու տալ Ադրբեջանին: Այս մասին ֆեյսբուքյան իր տեսաուղերձում ասել է ՀՀ նախկին արտգործնախարար Վարդան Օսկանյանը:
«Այս օրերին ամենահաճախակի հարցերից մեկն այն է, թե որն է այսօր ՀՀ-ի առջև կանգնած ամենամեծ մարտահրավերը և ոնց կարելի է դա դիմագրավել: Իհարկե, սա բարդ խնդիր է, բայց ես կուզենայի անդրադառնալ շատ ավելի հիմնարար խնդրի՝ դա ՀՀ իշխանությունների գործունեությունն է, դրանց, դժբախտաբար, քաղաքական անմեղսունակության խնդիրն է: Պատկերացրեք, նրանց դիվանագիտական և քաղաքական անմեղսունակությունն ինչպիսի բարձունքների է հասել, որ նրանց գործունեության այս մի քանի տարիների արդյունքում նրանք հասցրեցին ոչ միայն Արցախը տալ Ադրբեջանին, այլ Արցախը դատարկել ու տալ Ադրբեջանին: Սա իրոք իշխանությունների մեղսունակության պատճառով է քաղաքական և դիվանագիտական հարցերում: Պատասխանատվությունը և մեղավորությունը նրանցն է, այլ մեղավորներ այստեղ չփնտրենք, մի պահ վերանանք այդ մեղավորներից, այս խնդիրներից, միայն այն փաստը, որ այս արհավիրքը մեր ժողովրդի գլխին եկել է այս իշխանությունների օրոք դա միանշանակորեն, ուղղակիորեն նրանց դարձնում է մեղավոր այս հարցում և պատասխանատու, անկախ ամեն ինչից»,- ասել է նա:
Օսկանյանի խոսքով՝ իշխանությունների մեղավորություն ու պատասխանատվությունը շատ ավելի է ծանրանում, երբ մենք գիտենք, որ այս արհավիրքը մեր գլխին եկել է կոնկրետ իրենց սխալների պատճառով:
«Եթե իրոք Հայաստանում կան մարդիկ, որոնք անկեղծորեն հավատում են, կարծում են, որ այս հարցում կան այլ մեղավորներ, ասեմ, որ նրանք պարզապես շփոթում են պատճառն ու հետևանքը: Եթե մենք մեղավոր ենք համարում Ադրբեջանին, որ պատերազմ է սանձազերծել, այո, սանձազերծել է, դա հետևանք է: Եթե մենք մեղադրում ենք Արևմուտքին, որ պատերազմի ժամանակ մեզ անտեսեց, արհամարհեց, դա հետևանք է, եթե մենք մեղարում ենք մեր դաշնակցին, որ մեզ չօգնեց պատերազմի ժամանակ, դա հետևանք է, եթե մենք մեղադրում ենք Արցախի իշխանություններին, որ փաստաթուղթ են ստորագրել լուծարելու իրենց պետությունը, դա հետևանք է: Իսկապես որ երբ առաջին օրվանից Փաշինյանն ասաց, որ ինքը զրոյական կետից է սկսում, բոլորիս համար ակնհայտ էր, որ պատերազմ է լինելու: Երբ Փաշինյանը շեղվեց Նոյեմբերի 9-ի փաստաթղթի տառից, ոգուց և գնաց այլ ուղղություններով, խճճվեց այս հարցերում, ակնհայտ էր, որ Ռուսաստանը երես էր թեքելու: Երբ Փաշինյանը Պրահայում ճանաչեց Արցախը Ադրբեջանի կազմում, ակնհայտ էր, որ մենք Արցախը կորցնելու ենք: Այն պահին, երբ Փաշինյանը ասեց, որ Հայաստանը կապ չունի Արցախի հետ, Արցախն ինքնուրույն պետք է բանակցի, բոլորի համար ակնհայտ էր, որ Արցախը դատարկվելու է: Եվ ահա այսօր, երբ 100 հազարավոր մեր հայրենակիցներ լքել են իրենց տները, իրենց հողն ու ջուրը, հետևում թղել են մեր պատմամշակութային հուշարձանները, Հայաստանի իշխանությունները և Նիկոլ Փաշինյանը լռում են նրանց վերադառնալու հարցի կապակցությամբ, չի բարձրացվում այդ հարցը, հետևանքն այն է, որ այս հարցը մեկընդմիշտ փակվում է, ու թաղվում է»,-ասաց նա:
Օսկանյանը նշում է, որ երբ Ստրասբուրգում Փաշինյանը այս իրադարձություններից հետո հնարավորություն ուներ նման լսարանի առաջ ելույթ ունենալ, նա չբարձրացրեց այս հարցը, չխոսեց արցախցիների վերադառնալու իրավունքի մասին, նա, իրոք, «արցախյան հարցի դագաղի վերջին գամը մեխեց» և դրանով փակեց հարցը:
«Այսօր արցախցիների վերադարձի հարցը պետք է կենդանի պահել, սա իսկապես իրենց իրավունքն է, մենք ուղղակի չենք կարող դրանից հրաժարվել և դա հենց ՀՀ իշխանությունների պարտավորությունն է: Փոխարենը, Փաշինյանը Ստրասբուրգում խոսեց ժողովրդավարության մասին, ամենավառ ապացույցը, որ այսօր ՀՀ-ում չկա ժողովրդավարություն այն է, որ Փաշինյանը դեռ շարունակում է մնալ երկրի ղեկին այս արհավիրքից հետո, երբ մենք կորցրեցինք Արցախը, դատարկեցինք Արցախը: Այս երկու դեպքերից հետո, երբ երկրի ղեկավարը շարունակում է մնալ երկրի ղեկին, դա նշանակում է, որ ՀՀ-ում չկա ժողովրդավարություն, նման իրավիճակ կարող է լինել միայն ավտորիտար երկրներում, բռնատիրություններում»,- ասել է նա՝ նշելով, որ այլ երկրներում նման վարչապետը 5 րոպե չէր մնա իր պաշտոնին, նրան անմիջապես կվռնդեին:
