«Չեմ կարծում, որ կհասնեն անվտանգության բարձրացման, եթե պարտադրում են, որ տեխզննում անցնելուց գազի բալոնը ստուգված լինի». վարորդ
ՀՀ Քաղաքաշինության, տեխնիկական և հրդեհային անվտանգության տեսչական մարմինը մարտի 2-ին վարորդներին հիշեցրեց և տեղեկացրեց, որ տրանսպորտային միջոցների տեխնիկական զննություն անցկացնելու կարգում կատարվել են փոփոխություններ, որոնց համաձայն՝ այսուհետև պարտադիր պահանջ է, որ տեխնիկական զննություն իրականացնողն էլեկտրոնային համակարգի միջոցով պետք է ստուգի տեխնիկական զննության ներկայացված տրանսպորտային միջոցի` սեղմված բնական կամ հեղուկացված նավթային գազով աշխատելու համար վերասարքավորված լինելու դեպքում ավտոտրանսպորտային միջոցի վրա տեղադրված գազաբալոնների պարբերական վկայագրման հանգամանքը։
Որոշումն ուժի մեջ է մտել 2023 թվականի փետրվարի 25-ից։
Նշենք, որ մինչև այդ տեխզննումից հետո նշվում էր միայն մեքենայի գազաբալոնով վերասարքավորված լինել-չլինելը:
Վարորդները, սակայն, դեմ են այս փոփոխությանը, կարծում են, որ հերթական անգամ իրենց տուգանելու միջոց են գտել:
«Առաջ ուղղակի ասում էին՝ պետք է գազի բալոնը ստուգվի, իսկ հիմա ասում են՝ տեխզննում անցնելուց պարտադիր պայման է, որ գազի բալոնը ստուգված լինի: Չեմ կարծում, որ կհասնեն անվտանգության բարձրացման, այլ տարբերակ պետք է գտնեն»,- մեզ հետ զրույցում ասաց վարորդ Սարգիս Խաչատրյանը:
«Ես ունեմ գազի բալոն, բայց 4 ամիս է՝ բենզին եմ քշում: Կարո՞ղ է հետո էլ ասեն, որ պարտադիր պետք է նշվի գազ-բենզինը, ինչպես Վրաստանում է, անվադողերը մինչև 5 տարվա լինեն»,- նշեց մեկ այլ վարորդ:
Հավելենք, որ 168.am-ի հարցին, թե Հայաստանում օգոստոսի 1-ից չպետք է լիցքավորվեին տրանսպորտային միջոցների այն գազաբալոնները, որոնք տեղադրված կամ վկայագրված չէին լինի լիցենզավորված կազմակերպության կողմից, այս առումով Տեսչական մարմինն ի՞նչ է արձանագրել. արդյո՞ք բոլոր գազալցակայաններն են հետևել օրենքին, թե՞ եղել են խախտողներ, տեսչական մարմնի ղեկավար Գարեգին Խաչատրյանը պատասխանել էր.
«ՀՀ քաղաքաշինության, հրդեհային և տեխնիկական անվտանգության տեսչական մարմինը 2022թ. օգոստոսի 1-ից սկսել է խիստ վերահսկողություն իրականացնել։ Դիտարկվել է շուրջ 1000 գազալցակայան և բենզալցակայան, որտեղ արձանագրվել է շուրջ 730 իրավախախտում: Բոլոր իրավախախտումների համար կիրառվել են համապատասխան պատասխանատվության միջոցներ»:
Հիշեցնենք, որ Հայաստանում ավտոմեքենաների գազաբալոնների ստուգումը պարտադիր է դարձել 2022-ի օգոստոսի 1-ից։ Դա արվում է «Ավտոմոբիլային տրանսպորտի մասին» ՀՀ օրենքում 𝟐𝟎𝟐𝟐 թ. փետրվարի 𝟏𝟖-ից ուժի մեջ մտած փոփոխությունների համաձայն, ըստ որի՝ սեղմված բնական կամ հեղուկացված նավթային գազով ավտոտրանսպորտային միջոցներում գազաբալոններ կարող են տեղադրել միայն լիցենզավորված ընկերությունները։
