Գալու է ժամանակը, տող առ տող ցույց են տալու՝ ո՞ւր են գնացել այդքան փողերը, պետական այդքան միջոցները, ինչո՞ւ ոչնչացրեցին մեր գյուղատնտեսությունը. Աշոտ Հարությունյան

«Պրեսսինգ» հաղորդաշարում Սաթիկ Սեյրանյանի հյուրը ՀՀ Գյուղատնտեսության նախկին փոխնախարար (2016-2018թթ. հուլիս), ՀՀ ԱԺ Տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովի նախկին փորձագետ, ՀՀ Պետական վերահսկողական ծառայության ղեկավարի նախկին խորհրդական Աշոտ Հարությունյանն է:

Գյուղատնտեսությունն այս իշխանությունների համար 8-րդ դարակում է, գյուղատնտեսություն չկա, հողը կորցրել ենք…
Գյուղատնտեսության վիճակը ոչ թե վատ է, այլ շատ վատ է, գնում է ոչնչացման: Գործող իշխանությունների կողմից սա կամ դիտավորյալ է արվում, կամ չեն տիրապետում մասնագիտական հմտություններին:
Պետք է այնպես անել, որ գիտությունը ուժեղանա, գյուղատնտեսության մեջ նոր մեթոդներ ներդրվեն, մինչդեռ այսօր գյուղակադեմիայում ուսանողների զրո ընդունելություն է. պետք է ոչ թե գյուղացուն կրթել, այլ կրթօջախներում որակյալ գյուղատնտես պատրաստել: Հաջողության հիմքը գիտության և կրթության մեջ է:
Ակադեմիական քաղաք են պատրաստվում ստեղծել Աշտարակում, համալսարաններն ուզում են տեղափոխել… Ինչո՞ւ Աշտարակ… գուցե նկատի ունեն, որ Երևանը մոտենում է սահմանին և սահմանամե՞րձ է դառնում…
Գյուղացին չի կարողանում իր արտադրանքն իրացնել, գյուղացու խնդիրները չեն լուծվում, չկա փորձառու մասնագիտական վերլուծություն, համապատասխան ուղի անցած պրոֆեսիոնալ մասնագետներ չկան:
Պետտուրք բարձրացնելով՝ կարո՞ղ են խնդիր լուծել. սերմերի հավաստագրման համար տուրք դնելով՝ խնդիրը կլուծվի՞, իսկ տնկարանային տնտեսությունը, սերմարտադրությունն ի՞նչ կարգավիճակ պետք է ունենան՝ պետական, մասնավոր: Մարզերում պետք է տնկարաններ ստեղծեն՝ ըստ բնակլիմայական գոտիների, հետո նոր մտածեն տուրքը բարձրացնելու մասին:
Գյուղատնտեսությունն այսօր իրենց գործողությունների արդյունքում մահացած է, ինչպես մահացած մարդուն շնչառություն տալով չեն կարող կենդանացնել, այնպես էլ այստեղ ինչ ուզում են անել՝ ազդեցություն չի ունենալու:
Այս իշխանությունների գործողությունների արդյունքում 2018-ից ի վեր գյուղատնտեսությունն անկում է ապրում, ոչնչացնում են ամեն ինչ:
Գալու է ժամանակը, երբ երկիրը կսկսեն ղեկավարել պետականամետ, հայրենիքին նվիրված մարդիկ, և այսօրվա ապազգային ծրագրեր իրականացնող մարդիկ բյուջեի վրա տող առ տող ցույց են տալու, թե այդ փողերը, պետական միջոցներն ուր են գնացել…
Ինտենսիվ այգին շատ թանկ հաճույք է, դա մասսայական դարձնելը ճիշտ չէ:
Պետք է ոռոգման համակարգը վերականգնելու ծրագիր իրականացնել, արդիականացնել՝ կաթիլային ոռոգման և անձրևային համակարգ պետք է ներդնել՝ խնայելով Սևանի ջուրը: Այսօր դա է լուրջ խնդիրը:
Ոչ մի տեղ ծառերի սանիտարական հատում չի արվում: Դուք նկատե՞լ եք, թե ծառերն ինչո՞ւ են չորանում, տեսե՞լ եք, թե ինչ նոր ծառեր (այլանտ) են աճում Երևանում՝ ալերգիկ հետևանքներ ունեցող, որը շատ արագ տարածվում է և բազմանում՝ շուրջբոլորը ծառերը չորացնելով…
Այս իշխանությունները դրսից եկող ինչ-ինչ ծրագրեր են իրականացնում, որոնք իբր միտված են ոլորտի զարգացմանը, այնինչ բացարձակ հակառակ էֆեկտ են տալիս: Այդ ծրագրերը մեկ օրվա բան չեն, դրանք դետալ առ դետալ մշակված քայլերի հաջորդականություն են՝ հատուկ նպատակով ներդրված:
Եթե այս տարի էլ խաղողագործը չկարողացավ իր արտադրանքը մթերել, մի օր կվերանա հազարամյա պատմություն ունեցող մեր խաղողագործությունը: Ուզում են մեր խաղողի տեղական սորտերը վերանան, և ԼԳԲՏ-ի նման նոր սորտեր բերե՞ն հանրապետություն…
Մեր երկրում արտադրվող գյուղմթերքն այսօր բացարձակ մրցունակ չէ, դրա մասին պետք է մտածել, թեև ազգային աղճատված հոգեբանություն ունեցող մարդիկ կան, որ ուրախացել են՝ Թուրքիայի հետ առևտուր կանեն…
90-ականներին էլ ամբողջ ոսկին գնաց Թուրքիա՝ «դուբլյոնկա ու մաչոնկա» բերեցին, արդյունքում ի՞նչ ունեցանք… Հիմա էլ նույնն է… Հիշեք ՀՀՇ-ն ու այսօրվա իշխանությունների ձեռագիրը. համեմատեք: