Ո՞ր բուհեր են ամենաշատը դիմել, ո՞ր մասնագիտություններով և ո՞ր բաժիններն ընդհանրապես դիմորդ չունեն
Նախորդ տարվա հետ համեմատած՝ այս տարի դիմորդների թիվը կազմել է 13573՝ 13120-ի փոխարեն: Այս թվի մեջ ներառված են նաև ներբուհական քննություն հանձնողները:
Գնահատման և թեստավորման կենտրոնից 168.am-ին հայտնեցին, որ 164 մասնագիտությամբ դիմորդ չկա՝ պետական և մասնավոր բուհերը միասին վերցրած: Պետական բուհերում միայն 28 մասնագիտությամբ դիմորդ չկա, մնացածը մասնավոր բուհերում է:
Այսպիսով Շիրակի Մ.Նալբանդյանի անվան պետական համալսարանի հաշվապահական հաշվառում և հարկում մասնագիտությամբ որևէ մեկը չի դիմել, աշխարհագրություն, մաթեմատիկա առարկաների դեպքում՝ նույնպես դիմորդ չկա:
Վանաձորի Հովհ.Թումանյանի անվան պետական համալսարանի մաթեմատիկա մասնագիտությամբ ևս դիմորդ չկա:
Գավառի պետական համալսարանի՝ բնապահպանություն և բնօգտագործում, քարտեզագրություն և կադաստրային գործ մասնագիտություններով ևս դիմորդ չկա:
Երևանի Կոմիտասի անվան պետական կոնսերվատորիայի հետևյալ բաժինները չեն դիմել գործիքային կատարողականություն-տուբա, շվի, սրինգ, բլուլ, սանթուր, տավիղ, ֆագոտ:
Երևանի Կոմիտասի անվան պետական կոնսերվատորիայի Գյումրու մասնաճյուղում էլ դիմորդ չկա՝ երաժշտական արվեստ, գործիքային կատարողականություն-ջութակ, դիրիժորություն, արվեստի տեսություն. պատմություն և կառավարում մասնագիտություններով:
Երևանի Թատրոնի և կինոյի պետական ինստիտուտի արվեստաբանություն, թատերագիտություն, կինոգիտություն բաժիններ ևս ոչ ոք չի դիմել:
Հայաստանի ազգային ագրարային համալսարանում ագրոարդյունաբերության տեխնոլոգիաներ բաժնում դիմորդ չկա, ճշգրիտ գյուղատնտեսություն, կենդանագիտություն և կենսատեխնոլոգիա բաժիններում՝ նույնպես:
Հայ-Ռուսական համալսարանի հնդկագիտություն բաժինը ևս մնացել է առանց դիմորդի:
Ճարտարապետության և շինարարության Հայաստանի ազգային համալսարանում որևէ մեկը չի դիմել հետևյալ բաժիններում. երկաթգծի շինարարություն, երկաթգիծ, գծային տնտեսություն, տրանսպորտային համակարգեր:
Խ.Աբովյանի անվան հայկական պետական մանկավարժական համալսարանի իսպաներեն լեզու և գրականություն, գրադարանային-տեղեկատվական աղբյուրներ, շրջակա միջավայրի գիտությունները ևս դիմորդ չունեն:
ԳԹԿ-ից փոխանցեցին՝ ամենաշատ դիմորդները դիմել են հետևյալ բուհեր և մասնագիտություններով.
Երևանի Մ.Հերացու անվան պետական բժշկական համալսարան բուժական գործ՝ 671 դիմորդ,
Երևանի պետական համալսարանի ինֆորմատիկա և կիրառական մաթեմատիկա բաժին՝ 300 դիմորդ:
Հայաստանի պետական տնտեսագիտական համալսարանի կառավարում՝ 295 դիմորդ,
ԵՊՀ-ի Իրավագիտություն՝ 281 դիմորդ,
ՀՊՏՀ Ֆինանսներ՝ 276 դիմորդ:
