Զենքով ադրբեջանցիներ չպետք է լինեն Սյունիքում՝ մեր բնակիչների մոտ, վե՛րջ. Արման Թաթոյան
Երբ այսօր հրավիրված մամուլի ասուլիսի ընթացքում ՄԻՊ Արման Թաթոյանը, անդրադարձավ Սյունիքի մարզի տարածքում ադրբեջանցիների՝ սադրանքների գործողությունների դիմելուն, օրինակ՝ զենքով ճանապարհներին դիտարկում անելը, Հանրային հեռուստաընկերության լրագրողը հարց ուղղեց՝ «Միայն դրա՞նք են սադրանքներ»:
«Բա էդ բավարար չի՞: Հիմա, ասենք, կին ու երեխա անցնում են՝ մեր հայրենակիցներ, ասենք՝ իրենց պապիկի հետ, մեկ էլ տեսնում են՝ ադրբեջանցի զինվորականները զենքով կանգնած են, դա Ձեզ համար բավարար չի՞ սադրանք համարելը: Ինձ համար բավարար է, անգամ, եթե իրենք բերել են, իրենց «Բարի գալուստ» գրառումով ցուցանակը դրել են: Ինչի՞ են բերել՝ «Բարի գալուստ, Ադրբեջան» դրել, մի հատ էլ Հայաստանի տարածքը՝ Զանգեզուրի մասերը ներկայացրել են Ադրբեջան: Դա է անգամ սադրանք:
Ընդ որում, խմբերով են հայտնվում, զենքի ցուցադրությամբ: Դա սադրանք չի՞: Այն պատերազմական հանցագործությունների ֆոնին, այն թշնամանքի՝ ամեն օր, որ լսում ենք, բա ի՞նչ է դա: Ընդ որում, մի քանի կիլոմետրով մեր սահմանապահ զորքի վերակարգը վերևում է կանգնած, կտրված է ամբողջությամբ: Սադրանք չի՞ դա:
Մենք այսքան գերի ունենք, իրենց վիճակը… չենք կարողանում հետ բերել: Ընդ որում, մենք սահմանազատում, սահմանագծում՝ դասական իմաստով, հիմա չունենք: Ես նաև հրապարակեցի ԱԳՆ-ի դիրքորոշումը: Մենք հիմա ունենք սահմանների որոշման գործընթաց, որն իրավական անուն չունի, ըստ էության, միջազգային պրակտիկայում: Բայց դե, ունենք այն, ինչ ունենք: Դրա համար հանձնաժողովներ են պետք: Ու, այո՛, այդ սադրանքներն ուղիղ սադրանքներ են: Պետք է ամեն ինչ անենք, որպեսզի նման բաները մեր խաղաղ բաները իրար կապող ճանապարհներից վերանան:
Նաև սադրանք է անգամ այն, որ իրենցից մի քանի մետր ուղղակի բաժանող տարածքով մեր խաղաղ բնակիչներն են, երեխան խաղում է բակում, 7-8 տարեկան աղջիկները խաղում են, ճանապարհի երկրորդ կողմը իրենց զինվորականներն են, զինված մարդիկ են: Բա ի՞նչ է դա, սադրանք չի՞: Իհարկե, սադրանք է: Մեր խաղաղ բնակավայրերի բնակիչների հոգեկան վիճակի վրա չի՞ ազդում: Ազդում է»,- հարցին այսպես արձագանքեց Արման Թաթոյանը:
Լրագրողի հաջորդ հարցին, թե արդյո՞ք տարածքի բնակիչները ՄԻՊ-ին տեղեկացրել են ադրբեջանցիների՝ հայկական գյուղեր մտնելու մասին, Թաթոյանն արձագանքեց.
«Դե հիմա շատ կներեք, Շուռնուխի մի հատ ճանապարհ է: Դուք եղե՞լ եք այնտեղ: Պատկերացրեք՝ ճանապարհն է, այս կողմը ադրբեջանցիներն են, զինվորներ, այս կողմը մեր խաղաղ բնակիչներն են»:
Լրագրողի ճշտող հարցին, թե արդյո՞ք գյուղացիները հայկական տարածք մտած ադրբեջանցի տեսել են, պատասխանեց.
«Շատ կներեք, ի՞նչ պարտադիր է՝ հայկական տարածք կմտնեն կամ ադրբեջանական: Ես ասում եմ՝ ի՞նչ կապ ունի դա: Ես հարցնում եմ՝ ի՞նչ կապ ունի: Իհարկե, չունի: Թող ադրբեջանական փաստացի վերահսկողության ներքո լինեն, էդ ի՞նչ կապ ունի: Գորիսից Շուռնուխ, Որոտանից Շուռնուխ գնում է իմ հայրենակիցը, չէ՞: Իրենք էդտեղ, այդ Ադրբեջանի, որը կտրվել է այդ մասը, կարկատանով դարձել է Ադրբեջան, օրինակ, դա էլ է սադրանք: Անգամ Ադրբեջանի կազմում թող լինեն: Հետևաբար՝ ես այդ հարցը չեմ քննարկում: Այդ հարցը չի կարելի քննարկել: Կներեք, ամենայն հարգանքով Ձեր նկատմամբ, Ձեր հարցադրումը այդպես պետք չի անել, որովհետև ի՞նչ կապ ունի՝ հայկական տարածք մտե՞լ են, թե՞ չէ: Մեր բնակավայրերն իրար կապող քաղաքացիական ճանապարհների վրա են կանգնած»:
Ապա, Թաթոյանի պատասխանը լսելուց հետո, որ քաղաքացիները տեղեկացված էին, որ այդ հատվածները ադրբեջանական վերահսկողության տակ են, նա հարց հնչեցրեց.
«Իրենց համար կանխատեսելի էր, չէ՞, որ տեսնելու են ադրբեջանական զինվորների»:
«Ադրբեջանական զինվորականների՞, իհարկե կանխատեսելի չէր: Կանխատեսելի չէր, բայց ախր այս հարցերը չպիտի առաջ գան: Այս հարցերը պիտի կանգնեն այնտեղ, որ ասում ենք՝ իրենք չպիտի զենքով լինեն մեր բնակիչների մոտ, վերջ: Կանխատեսելի՞ էր, կանխատեսելի չէ՞ր, ո՞նց էր, չպիտի այլևս առաջ գնանք մենք այս հարցերով: Մենք որքան առաջ ենք գնում, մեր բնակիչների իրավունքներից հեռանում ենք»,- պատասխանեց մարդու իրավունքների պաշտպանը՝ նշելով, որ ադրբեջանցիները նման սադրանքների են դիմում խաղաղ բնակչությանն ահաբեկելու միտումով:
Մանրամասները՝ 168.am-ի տեսանյութում
