Տավուշում ծանր վիրավորում ստացած և այսօր մահացած ժամկետային զինծառայող Ա․ Մուրադյանի ընտանիքին 20 տարվա ընթացքում կտրամադրվի 58 մլն դրամի չափով հատուցում․ «Զինծառայողների ապահովագրության» հիմնադրամ
Հուլիսի 14-ին ծանր վիրավորում ստացած և այսօր մահացած ժամկետային զինծառայող, շարքային Արթուր Բագրատի Մուրադյանի ընտանիքի անդամներին «Զինծառայողների ապահովագրության» հիմնադրամի կողմից կտրամադրվեն հատուցումներ առաջիկա 20 տարվա ընթացքում։ Այս մասին հայտարարություն է տարածել «Զինծառայողների ապահովագրության» հիմնադրամը։
«Ինչպես արդեն տեղեկացրել է Պաշտպանության նախարարությունը, հուլիսի 23-ին ՊՆ կենտրոնական կլինիկական զինվորական հոսպիտալում մահացել է հուլիսի 14-ին ծանր վիրավորում ստացած ժամկետային զինծառայող, շարքային Արթուր Բագրատի Մուրադյանը (ծնված 2001թ., Երևանի թիվ 1 ԶԿ):
«Զինծառայողների ապահովագրության» հիմնադրամն իր խորին ցավակցությունն ու զորակցությունն է հայտնում Արթուր Մուրադյանի ընտանիքի անդամներին, հարազատներին և ծառայակիցներին:
Ցանկանում ենք տեղեկացնել, որ Արթուր Մուրադյանի ընտանիքի անդամներին Հիմնադրամի կողմից կտրամադրվեն հատուցումներ առաջիկա 20 տարվա ընթացքում: Հատուցման չափը կկազմի 58 մլն ՀՀ դրամ, որից 10 մլն դրամը կտրամադրվի միանվագ, իսկ մնացածը՝ ամսական հավասար վճարներով»,- ասված է հայտարարության մեջ:
