COVID-19. Նյու Յորքն ու Մոսկվան վարակվածության ամենաշատ դեպքեր ունեցող վարչական տարածքներն են
ԱՄՆ-ի Ջոն Հոփքինսի հետազոտությունների համալսարանի տվյալների համաձայն` աշխարհում կորոնավիրուսից ամենաշատ տուժած վարչական տարածքը (մարզ, շրջան, նահանգ) Նյու Յորքն է: Այստեղ, այլ շրջանների համեմատ, վարակակիրների ամենամեծ թիվն է գրանցվել: Համալսարանի տվյալների համաձայն, Նյու Յորքում հաստատված դեպքերի թիվը 380 հազար 892 է:
Վարակակիրների մեծ թվով հաջորդ տեղում Մոսկվան է, որտեղ հաստատված դեպքերի թիվը 201 հազար 221 է: Վարակակիրների թվով հաջորդ վարչական շրջանը կրկին ԱՄՆ-ում է: Երրորդ տեղում գտնվող Նյու Ջերսի նահանգում վարակի 165 հազար 816 դեպք է հաստատվել: Հաջորդ տեղում Բրազիլիայի Սան Պաուլո նահանգն է որտեղ կորոնավիրուսով վարակվել է 162 հազար 520 մարդ:
Հնգյակը եզրափակում է Անգլիան՝ 156 հազար 018 ընդհանուր հաստատված դեպքով:
Վարակի ծագման երկիր Չինաստանի վարչական տարածքներից ամենաշատը տուժել է Հուբեյ նահանգը, որտեղ 68 հազարից ավելի վարակի դեպք է գրանցվել:
Նոր կորոնավիրուսի առաջացրած հիվանդության բռնկումը 2019-ի վերջին գրանցվել է Կենտրոնական Չինաստանում, այնուհետև տարածվել 212-ից ավելի երկրում և տարածքում: Մարտի 11-ին Առողջապահության համաշխարհային կազմակերպության կողմից ճանաչվել է համավարակ (պանդեմիա)։
