Ձյուդոիստները վարկանիշային մրցաշարերը կվերսկսեն պանդեմիայի նվազ վտանգավոր փուլում
Ձյուդոյի միջազգային ֆեդերացիան միջազգային և վարկանիշային մրցաշարերը կվերսկսի կորոնավիրուսի պանդեմիայի նվազ վտանգավոր շրջանում: Այս մասին գրում է ՀԱՕԿ-ը` մեջբերելով միջազգային ֆեդերացիայի նամակը ազգային ֆեդերացիաներին.
«Մենք ուշադիր հետևում ենք աշխարհի առողջապահական իրավիճակին, տարբեր երկրների կառավարությունների հրահանգներին և COVID-19- ի դեմ պայքարի ընթացքին: Ուրախ ենք, որ որոշ երկրներ իրենց սահմանները բացելու ճանապարհին են: Ֆեդերացիան քննարկում է համաշխարհային մրցաշարերի ժամկետները հետաձգելու հարցը: Երբ իրավիճակը կդառնա անվտանգ, կվերսկսվեն օլիմպիական խաղերի վարկանիշային մրցաշարերը։ Նախատեսում ենք գործընթացը սկսել սեպտեմբերին: Հուսանք, որ այդ ժամանակ առողջապահական ճգնաժամն այլևս չի ազդի ճանապարհորդության և աշխատանքային պայմանների վրա»:
