Ucom ընկերության ֆինանսական ցուցիչները. ինչու, այնուամենայնիվ, հեռացավ Հայկ Եսայանը
![](https://168.am/wp-content/uploads/2020/05/98600207_266682507815224_2123923149631258624_n.jpg)
Ucom ընկերությունը վերջին ամիսներին մամուլի ուշադրության կենտրոնում է։ Ընկերության շուրջ զարգացումները կարծես թե հանգուցալուծման հասան այն պահին, երբ նախկին տնօրեն Հայկ Եսայանը հայտնեց հեռանալու, նոր ընկերություն հիմնելու մասին և նոր տնօրենը՝ Արա Խաչատրյանը, ստանձնեց գործընթացների կառավարումը։
Վերջին տասնամյակի ամենախոշոր կորպորատիվ վեճը բավականին մութ անկյուններ ունի։ Ընկերության տնօրենների խորհրդի նախագահ Գուրգեն Խաչատրյանի հայտարարությամբ պետական բարձրաստիճան պաշտոնյաների մակարդակով պահանջ է դրվել օտարելու Ucom-ը, ինչը կարող է նշանակել, որ Եսայան եղբայրները միայնակ չեն գործել։ Այնուամենայնիվ, մեծամասնական բաժնետերերի հայտարարության մեջ, որտեղ խոսում էին, փաստորեն, և՛ «Գալաքսի» ընկերությունների խումբը և՛ «Տաշիրը», նշված էր, որ իրենք 12 տարի անընդմեջ ներդրումներ են կատարել և երբևէ դիվիդենտ չեն ստացել, ինչից կարելի է հասկանալ, որ ընկերությունում Հայկ Եսայանի առաջ ֆինանսական արդյունավետ կառավարման խնդիրներ է դրված եղել, ինչն էլ կարող էր հակասությունների պատճառ դառնալ։
Մեր տնտեսական բլոկը փորձել է հասկանալ իրավիճակը՝ վերլուծելով հանրայնորեն հասանելի և հայտնի ֆինանսական ցուցիչները։ Ucom-ի պարտքերը հատել էին 40 մլն ԱՄՆ դոլարի շեմը Տնտեսական վերլուծության տեսանկյունից արդյունավետության հիմնական ցուցանիշներից շահութաբերության ցուցանիշններն են` սեփական կապիտալի շահութաբերություն (ROE), ակտիվների շահութաբերություն (ROA) և զուտ շահույթի մարժա (NPM): Հասկանալու համար, այդյոք Ucom-ը կառավարվել է արդյունավետ, դիտարկենք նշված ցուցանիշները այդ ընկերության համար: Որպես տեղեկատվության աղբյուր օգտագործվել է ընկերության հաշվետվությունները, որոնք առկա են ընկերության և Հանրային ծառայությունները կարգավորող հանձնաժողովի (ՀԾԿՀ) պաշտոնական կայքում, ինչպես նաև ընկերության պարտատոմսերի թողարկման ազդագիրը:
Շահութաբերության ցուցանիշները բնութագրում են ընկերության ունակությունը շահույթ ապահովել իր բաժնետերերին: Հաշվարկվում է որպես զուտ շահույթի և ակտիվների հարաբերակցություն, որոնք ապահովել են այս շահույթները: Ըստ ընկերության հաշվետվությունների՝ վերջին 4 տարիների ընթացում այն չի ունեցել շահույթ և աշխատել է միայն վնասով` 2018-ի վերջի դրությաբ կուտակված վնասը կազմել է 19,5 մլրդ դրամ (շուրջ 40,4 մլն ԱՄՆ դոլար): Ընդ որում 2016-2018թթ. ընթացքում ներդրումային գործունեությունից դրամական միջոցների զուտ հոսքերը, այսինքն ներդրումները, ընկերությունում կազմել են շուրջ 48.5 մլրդ դրամ (շուրջ 100 մլն ԱՄՆ դոլար):
Իսկ ընկերության զուտ շահութաբերության (NPM) ցուցանիշը նույն ժամանակահատվածի համար կազմել է -12.2% (տես աղյուսակը): Այսինքն ներդրումների աճը չի բերել շահութաբերության: Ընկերության շահութաբերությունը մոտ էր զրոյին Ակտիվների շահութաբերությունը (ROA) 2016-2018թթ. ընթացքում կազմել է շուրջ 4.3%: Իսկ նույն ժամանակահատվածում ընկերության ակտիվները աճել են մոտ 9.2 մլրդ դրամով: Այսպիսով ակտիվների աճը ևս չի հանգեցրել ընկերության շահութաբերության: Եվ վերջապես, ընկերության սեփական կապիտալի շահութաբերության (ROE) ցուցանիշի վերլուծությունը ևս վկայում է այն մասին, որ չնայած սեփական կապիտալի աճին (մոտ 8.4 մլրդ դրամով) 2016-2018թթ. ընթացքում ընկերության ղեկավարությունը չի ապահովել ընկերության շահույթի աճ:
Այսպիսով, ամփոփելով վերլուծությունը կարող ենք եզրակացնել, որ չնայած Ucom ընկերությունում կատարված ներդրումներին, ընկերությունը չի ապահովել իր գործառույթները, չի աշխատել որպես շահութաբեր տնտեսական միավոր ինչն էլ, կարող էր առաջացնել բաժնետերերի դժգոհությունը և տնօրենի հեռացման պատճառ հանդիսացել։
Հնարավոր է՝ գործընթացներն իրոք, ընկերության պատերից դուրս են, հնարավոր է նաև խոսքը ոչ արդյունավետ կառավարման մասին է եղել. ոչ նախկին, ոչ ներկա տնօրինությունը այս մասով մեկնաբանություն չեն անում։