«ՀՔԾ-ի ներկայացուցիչները Քաղաքապետարանի շենքում են». Դավիթ Խաժակյանին այս ժամին Քաղաքապետարան է տարել ներքին զգացողությունը

Երևանի ավագանու «Լույս» խմբակցության ղեկավար Դավիթ Խաժակյանը ներքին համոզում ունի, որ ՀՔԾ ներկայացուցիչները հիմա Երևանի քաղաքապետարանի գլխավոր մասնաշենքում են, և, որ այնտեղ այժմ փաստաթղթեր են կեղծվում: Ավագանու անդամը Քաղաքապետարանի շենքից ուղիղ եթեր էր մտել, այս ժամին նրան այնտեղ է տարել «հանկարծ արթնացած ներքին զգայարանը»: Դավիթ Խաժակյանը վաղը հրավիրվել է ՀՔԾ՝ բացատրություն տալու իր ներկայացրած հաղորդման մասով, ըստ որի՝ Երևանի քաղաքապետարանում տեղի է ունեցել պաշտոնեական կեղծիք և պաշտոնեական լիազորությունների անցում:

«Քաղաքապետարան եկա ներքին անհանգստությամբ, որը վերաբերում էր որոշ գործողությունների, որոնք այս պահին այստեղ կատարվում են: Իմ ներքին զգայարանը ուժեղ է: Տեսիլքով հասկացա, որ մի քանի խնդիր կա: Հիմա այս շենքում, ինչպես ես զգում եմ իմ ներքին զգայարաններով, գտնվում են ՀՔԾ-ի ներկայացուցիչները, և որոշակի քննարկում է իրականացվում, թե ինչպես է հնարավոր կարգավորել պաշտոնեական կեղծիքի հարցը»,- պնդում է Դավիթ Խաժակյանը ֆեյսբուքյան իր լայվում:

Լայվի ավարտին Խաժակյանն ասաց, որ բարձրանում է քաղաքապետի խորհրդականի սենյակի հարկ և գուցե այնտեղ տեսնի ՀՔԾ ներկայացուցիչներին:  Խաժակյանը կոչ արեց ՀՔԾ-ին ու Քաղաքապետարանի աշխատակիցներին զերծ մնալ փաստաթղթեր կեղծելուց կամ ստեղծելուց, որովհետև երբեք չեն իմանա, թե իր ձեռքի տակ ինչ փաստաթղթեր կան: