«Պետական տուրքի հարցով դիմել ենք ՀՀ նախագահին, որ փաթեթը չստորագրի և ուղարկի Սահմանադրական դատարան». «Վարորդի ընկեր» հ/կ
Ազգային ժողովը երկրորդ ընթերցմամբ և ամբողջությամբ դեկտեմբերի 9-ին ընդունեց «Վարչական իրավախախտումների վերաբերյալ ՀՀ օրենսգրքում փոփոխություններ և լրացումներ կատարելու մասին» և կից ներկայացված օրենքների նախագծերի փաթեթը:
«Մի շարք առաջարկներ արել էինք, որոնք չեն ներառվել նախագծում, բայց պետական տուրքի մասին մի օրենք ընդունեցին՝ հետը գնաց: Դատարան դիմելու համար ֆիզիկական անձանց նկատմամբ պետական տուրք սահմանեցին: Դա շատ վատ է, այդ դրույթը չի քննարկվել Ազգային ժողովում, առանձին, հանձնաժողովի նիստի ժամանակ են քննարկել, բայց վերջին պահին ներառեցին՝ գնաց»,- 168.am-ի հետ զրույցում ասել էր «Վարորդի ընկեր» հասարակական կազմակերպության համահիմնադիր Տիգրան Քեյանը:
«Վարորդի ընկեր» հ/կ-ն դիմել է ՀՀ նախագահին, որ վերջինը դիմի ՀՀ Սահմանադրական դատարան, որպեսզի պարզեն՝ ընդունված օրենքը համապատասխանո՞ւմ է Սահմանադրությանը, թե՞ ոչ:
«Օրենսդիր և գործադիր մարմինը հաշվի չի առել Սահմանադրական դատարանի այն որոշումը, որ պետական տուրքի արտոնության կիրառումը նպատակահարմար չէ: Դրա համար մենք դիմել ենք ՀՀ նախագահին, որ այդ փաթեթը չստորագրի և ուղարկի ՍԴ: Այս օրենքի փոփոխությամբ քաղաքացիները Ճանապարհային ոստիկանության աշխատակցի կողմից տուգանքը վիճարկելու համար Առաջին ատյանի դատարանին պետք է վճարեն 4000 դրամ պետական տուրք, ու, եթե արդյունքի չհասնեն՝ մյուս երկու ատյաններում վիճարկելու համար, համապատասխանաբար՝ 10.000 և 20.000 դրամ են վճարելու:
Օրենքը ներկայացնողները մատի փաթաթան են սարքել այն, որ, երբ վարորդը հաղթի դատը՝ գումարը նրան հետ է վերադարձվում: Խնդիրն այստեղ այլ է: Բազմաթիվ դեպքերում հենց վարորդն է ուզում իր իրավացիությունը ստուգել դատարանի միջոցով, որն այս պահին անհասանելի է դառնում, հենց ֆինանսական բեռով սահմանափակում են այդ իրավունքը»,- 168.am-ի հետ զրույցում ասաց «Վարորդի ընկեր» հ/կ համահիմնադիր Դավիթ Պեդանյանը:
