Քաղցկեղ և արյան հիվանդություններ ունեցող երեխաները միացել են «Սկաֆանդր» միջազգային ծրագրին
Պրոֆ Ռ. Յոլյանի անվան Արյունաբանական կենտրոնում Երևանում կայացած «Unistar Armenia» փառատոնի շրջանակում «City of Smile/ժպիտների քաղաք» հիմնադրամի հետ համատեղ նոյեմբերի 24-ին անցկացվել է տիեզերական արթ-թերապիայի վարպետաց դաս տիեզերագնացների մասնակցությամբ:
Ռուս տիեզերագնացներ Անդրեյ Բաբկինի և Նիկոլայ Տիխոնովի հետ քաղցկեղ և արյան հիվանդություններ ունեցող հայ մանուկները միացել են «Սկաֆանդր» միջազգային գեղարվեստական ծրագրին և նկարել հատուկ կտավների վրա, որոնցից պատրաստվելու է տիեզերագնացի կոստյում՝ սկաֆանդր ու տիեզերագնացների հետ ուղարկվելու է տիեզերք՝ իրականացնելու փոքրիկների երազանքը:
«Երազող» անվանումը կրող սկաֆանդրի համար իրենց երազանքներն են նկարել արդեն աշխարհի 6 երկրներում՝ Ռուսաստանում, Շվեյցարիայում, Ֆրանսիայում, Գերմանիայում, Անգլիայում և Բելգիայում քաղցկեղ ունեցող երեխաները: Հայաստանը կլինի միացող 7-րդ երկիրը նախատեսվող 17 երկրների շարքից: «Երազող»-ը աշխարհի տարբեր ծայրերի երեխաների երազանքները տիեզերք կտանի 2020-ին:
