«Յուրահատուկը» վերադառնում է
Կարող եք չսիրել Ժոզեին այնքան ժամանակ, որքան ցանկանում եք, քննադատել նրա խաղաոճը և ընդդիմանալ նրա հայտարարություններին, բայց չճանաչել նրան՝ որպես հիանալի մարզիչ, պարզապես չեք կարող:
«Պորտուի» հետ Չեմպիոնների լիգայում տարած հաղթանակը, «հեղափոխությունը» «Չելսիի» հետ, թրեբլը՝ «Ինտերի» հետ, «Ռեալի» հետ չեմպիոնական մրցաշրջանի 100 միավորը, Եվրոպա լիգան և Պրեմիեր լիգայում երկրորդ տեղը «Մանչեսթեր Յունայթեդի» հետ խոսում են նրա փոխարեն: Ի դեպ, վերը նշվածից վերջինն է, որ, Մոուրինիոյի խոսքով, իր կարիերայում ամենակարևորն ու դժվարն է:
Անցած տարվանից պորտուգալացին գործազուրկ է՝ մարզչական տեսանկյունից: Բայց ներկայիս մրցաշրջանից սկզբից նա հաճախ նստում է Sky Sports-ի փորձագետի աթոռին՝ միաժամանակ հայտնվելով տարբեր գովազդներում և իր մասին վավերագրական ֆիլմերում: Եթե սկզբում Ժոզեն իրեն մի փոքր անհարմար էր զգում նոր կարգավիճակում, ապա հիմա նա բավականին ազատ է և երբեմն նույնիսկ կոշտ խոսում է իր նախկին ակումբներում՝ «Չելսիում» և «Մանչեսթեր Յունայթեդում» առկա խնդիրների մասին: Հաճախ, իհարկե, նա անդրադառնում է «կարմիր սատանաներին» և, մասնավորապես, Էդ Վուդվորդին, որի հետ վերջերս կոնֆլիկտ էր ունեցել:
Իհարկե, Ժոզեն չի պատրաստվում երկար ժամանակ մնալ հեռուստատեսության վերլուծաբանի կարգավիճակում և արդեն հույս ունի գտնել «իր ակումբը» և հնարավորինս շուտ անցնել աշխատանքի: Ըստ ԶԼՄ-ների տեղեկությունների՝ պորտուգալացին անընդհատ ակումբ ղեկավարելու առաջարկներ է ստանում, բայց մարզիչը հրաժարվում է։ Ամենաթարմ տարբերակներից են՝ «Միլան» (բացարձակ խառնաշփոթ, դժվար կլինի գալ և անմիջապես արդյունք ցույց տալ), «Լիոն» (չի ուզում պայքարել 2-րդ տեղի համար), «Մոնակո» (այստեղ նույնիսկ դժվար է 2-րդ տեղը զբաղեցնելու մասին երազել), Պորտուգալիայի հավաքական (դեռ շատ երիտասարդ է):
Բայց կան նաև այլ թիմեր, որոնք իրենց ներկայիս կարգավիճակով գտնվում են մի փոքր ավելի բարձր մակարդակում, և որոնք շուտով թոփ-մարզչի կարիք կունենան։
«Բորուսիա Դորտմունդ»
Ասել, որ գերմանական թիմում ամեն ինչ վատ է, սխալ կլինի, բայց ամեն ինչ իդեալական էլ չէ։ Գերմանիայի առաջնությունում «Բորուսիան» ստաբիլ չէ, իսկ Չեմպիոնների լիգայում «Ինտերի» հետ պայքարը շատ թեժ է։
Իհարկե, Մոուրինիոյի՝ «Բորուսիա» տեղափոխվելուն դժվար է հավատալ, քանի որ 5 տարի առաջ՝ Կլոպի օրոք, գերմանական թիմը ճնշում էր հարձակման գծում, իսկ այժմ նոր մարզիչը ստիպված կլինի գնել բազմամիլիոնանոց պաշտպանական գիծ և ամբողջովին (չնայած շնորհիվ Ֆավրի՝ ոչ ամբողջովին) փոխել փիլիսոփայությունն ու ոճը։ Պատկերացրեք, որ, օրինակ, «Ատլետիկոն» սկսի խաղալ «Լիվերպուլի» կամ «Մանչեսթեր Սիթիի» ֆուտբոլ: Դժվար է հավատալ։
Մյուս կողմից՝ ակումբի կարգավիճակը, կազմը և ֆինանսական աջակցությունը պարզապես այլևս թույլ չեն տա, որպեսզի Դորտմունդի «Բորուսիայի» նման ակումբը մնա 5-7 տեղերում և առաջիկա տարիներին խաղա Եվրոպա լիգայում: Այո, Բունդեսլիգայում կան շատ արժանի և լավ թիմեր, բայց, փաստորեն, չեմպիոնության հիմնական պայքարը «Բավարիայի», «Դորտմունդի» և «Լայպցիգի» միջև է: Մրցակցություն կա, բայց նույնը չէ, ինչ Պրեմիեր լիգայում, որտեղ տիտղոսը, ինչպես պարզվեց 2016 թվականինին, կարող է վերցնել 20 թիմերից որևէ մեկը:
Բայց, ինչպես հաղորդում է El Chiringuito-ն, Մոուրինիոն մերժել է Դորտմունդի առաջարկը նախորդ շաբաթ՝ հույս ունենալով սպասել մի այլ հայտնի ակումբում աշխատելու հնարավորություն ստանալուն:
«Ռեալ Մադրիդ»
Դա իսկապես լեգենդար վերադարձ կլինի, որը համեմատելի կլինի միայն անցած տարվա «Լիվերպուլ»-«Բարսելոնա» կամ 2017 թվականի «Բարսելոնա»-ՊՍԺ խաղերի հետ։
Ճիշտ է, ընդամենը մի քանի շաբաթ առաջ գրեթե բոլորը հավատում էին դրան, իսկ հիմա (գոնե առաջիկա ամիսներին) դժվար կլինի հավատալ, որ Զիդանը կրկին կհեռանա։ Զիդանի երկրորդ գալուստը միայն հոկտեմբերի կեսերին սկսեց օգուտ բերել։ «Ռեալը» Լա Լիգայում կիսում է առաջին տեղը «Բարսելոնայի» հետ, իսկ Չեմպիոնների լիգայում՝ 90%-ով, արդեն 1/8 եզրափակչում է:
Եթե երկրպագուները միայն երազում էին և անհամբերությամբ սպասում էին Զիզուի երկրորդ ժամանմանը, հիմա շատ երկրպագուներ զգուշությամբ կսպասեն «Յուրահատուկի» ժամանմանը: Ո՞վ գիտի, միգուցե բարձր ճնշման պատճառով Ժոզեն ամբողջովին հաջող չընդունի էստաֆետը ֆրանսիացուց և տապալի մրցաշրջանի երկրորդ մասը, վիճի և բաժանվի շատ աստղերից և վերջում վիճի Պերեսի հետ և կրկին գնա հանգստանալու։
«Արսենալ»
Լոնդոնյան թիմը շարունակում է չափազանց անվստահ ֆուտբոլ խաղալ՝ չցուցադրելով արդյունքներ, իսկ Ունայի Էմերին շարունակում է «կերակրել» հանդիսատեսին անընդհատ կրկնվող բառերով. «մենք ավելի ենք լավանում», «թիմն ընթանում է ճիշտ ուղղությամբ», «պաշտպանությունն ավելի հուսալիորեն է խաղում»:
Բայց միգուցե, այս պահի դրությամբ, Ժոզեն է, ով կարող է ցույց տալ, թե ինչպես պետք է խաղա հուսալի պաշտպանությունը, և եթե կարծում եք, որ հարձակվողական խաղը կվերանա, ապա պարզապես նայեք Էմերիի սաների ցուցադրած արդյունքներին վերջին ամսվա ընթացքում։
Ըստ բրիտանական լրատվամիջոցների՝ Մոուրինիոն հետաքրքրված է «Արսենալում» աշխատելու հնարավորությամբ, և մեկ շաբաթ առաջ պորտուգալացին նույնիսկ ընթրիք էր կազմակերպել «Արսենալի» տնօրեն Ռաուլ Սանյելիի հետ: Հայտնի է նաև, որ լոնդոնցիները փնտրում են մարզիչ առանց լեզվական խնդիրների, որը ճանաչում է լիգան և խաղացողներին: Բացի այդ, հայտնի է, որ Մոուրինիոն դեռ չի վաճառել տունը Լոնդոնում, այս պահին նրա ընտանիքն այնտեղ է ապրում:
«Բավարիա»
Վերջին և, ինչպես թվում է, Մոուրինիոյի կարիերան շարունակելու ամենահավանական ճանապարհը: Նախ՝ թիմն իր ներկա կարգավիճակով համեմատելի է միայն «Ռեալի» հետ, եթե հաշվի առնենք վերը նշված բոլոր ակումբները: Երկրորդ, գերմանացիները բոլոր մրցաշարերում լավ արդյունքներ են գրանցում։ Չեմպիոնների լիգայում «Բավարիան» արդեն դուրս է եկել խմբից, իսկ Բունդեսլիգայում նրանք առաջին տեղից հետ են մնում ընդամենը մեկ միավոր: Երրորդ՝ հզոր կազմ: Կավի հսկայական կտոր, որից դուք կարող եք ցանկացած բան քանդակել: Չորրորդ, գլխավոր մարզչի աթոռը դատարկ է, պարզապես անհրաժեշտ է գալ և նստել:
Անցած շաբաթ գերմանական մամուլում հայտնվեցին «Բավարիայի» հաջորդ հավանական մարզչի ընդամենը երեք անուն՝ Ալեգրի (քիչ հավանական է, շշուկներն արագ վերացան), Վենգեր (նրանք պայմանագիր էին առաջարկել միայն մրցաշրջանի ավարտին, ֆրանսիացին դադարեցրեց բանակցությունները մեկ շաբաթ անց) և Մոուրինիո (ամենահավանական տարբերակը վերջին տարիներին):
Գաղտնիք չէ, որ Մոուրինիոն շատ կցանկանար աշխատել Գերմանիայում. իր համար լիովին նոր լիգա: Հայտնի է նաև, որ այս տարի նա սկսել է գերմաներեն սովորել։
Սիրարփի Աղաբաբյան
