Iran Air ավիաընկերությունն սկսել է չվերթներ իրականացնել Վրաստան
Iran Air իրանական խոշորագույն ավիաընկերությունն սկսել է չվերթներ իրականացնել Վրաստան: Այդ մասին հղում անելով «Գրուզիա Online»-ին, հայտնել է Վրաստանի էկոնոմիկայի նախարարության Քաղաքացիական ավիացիայի գործակալությունը:
Թեհրան-Թբիլիսի-Թեհրան երթուղով ավիաչվերթերն Airbus A320 օդանավով իրականացվելու են մինչեւ ամառային նավիգացիոն սեզոնի վերջը (մինչեւ հոկտեմբերի 27-ը), շաբաթը երկու անգամ, յուրաքանչյուր երեքշաբթի եւ շաբաթ օրերը: Ավիաընկերությունը Թբիլիսի թռիչքներ իրականացնելու թույլտվությունն ստացել է մարտի 27-ին:
Այսօրվա դրությամբ Վրաստանի եւ Իրանի միջեւ կանոնավոր եւ չարտերային չվերթներ են կատարում արդեն ութ ավիաընկերություններ՝ Georgian Airways-ը, Myway Airlines-ը, ATA Airlines-ը, Taban Airlines-ը, Qeshm Airlines-ը, Zagros Airlines-ը, Kish Air-ը եւ Iran Aseman Airlines-ը:
