Տնտեսական ցուցանիշներն ու Ամուլսարի ծրագիրը
Կառավարությունը այս տարվա համար խոստացել է ապահովել 830-840 մլն դոլարի ներդրումներ։ Գաղտնիք չէ, որ ակնկալվող ներդրումների մեծ մասը պայմանավորված է Ամուլսարի ոսկու հանքավայրը շահագործող «Լիդիան Արմենիա» ընկերության գործունեությամբ։
Ինչ ծավալի ներդրումներ է կատարել «Լիդիանը» մինչ այժմ և որքան է նախատեսվում ներդնել։
Մեր հարցմանն ի պատասխան՝ ընկերությունից պատասխանեցին, որ 2016 թվականին ներդրվել է 22.4 մլն դոլար, ևս 12.1 մլն դոլար՝ ոչ դրամային տիպի ներդրումներ (ծառայություններ և ֆինանսական վճարներ):
2017 թվականի առաջին կիսամյակում «Լիդիանն» արդեն կատարել է 91.5 մլն դոլարի ներդրում, և ևս 4.8 մլն դոլարի ներդրում՝ ոչ դրամային տեսքով։ Մինչև տարվա վերջ՝ երկրորդ կիսամյակի ընթացքում, կատարվելու է ևս 140 մլն դոլարի ներդրում։
Այսպիսով, միայն «Լիդիան Արմենիա» ընկերության կողմից միայն այս տարի կատարվելու է ավելի քան 236 մլն դոլարի ներդրում։ Դա այս տարի կառավարության կողմից խոստացվող ներդրումների 1/3 մասն է։ Ավելի խոշոր և ավելի իրատեսական օտարերկյա ներդրում պարզապես չկա։ Մոտ 140 մլն դոլարի ներդրումներ էլ ընկերության կողմից նախատեսվում են 2018 թվականին։
Ներդրումների թվերին գումարեք գումարեք հանքի շինարարության և շահագործման ընթացքում ստեղծվելիք աշխատատեղերը, պետությանը վճարվելիք հարկերը, կողմնակի տնտեսական ազդեցություններն ու մուլտիպլիկատիվ էֆեկտը։
Այս ամենը հաշվարկված է և ընկած է կառավարության միջնաժամկետ տնտեսական կանխատեսումների և քաղաքականության հիմքում։ Այսքանը բավական է՝ հասկանալու համար Ամուլսարի ծրագրի տնտեսական կարևորությունը ու կառավարության շահագրգռվածությունը, որպեսզի նախագիծը մինչև վերջ բարեհաջող ընթանա։
