Մարդ, որ 30 տարի իր կյանքը նվիրել է երկրի պաշտպանությանը, երբեք չի կարող լինել ահաբեկիչ. Միհրան Մախսուդյան
Միհրան Մախսուդյանը գրում է. «Սիրելի հայրենակիցներ,
Հինգ ամիս ապօրինի ու քաղաքական պատվերով կազմակերպված կալանքի ավարտից հետո վերջապես վերականգնեցի իմ ֆեյսբուքյան էջը։ Իմ նկատմամբ իրականացված այս քայլը ոչ միայն ինձ էր ուղղված, այլ նաև այն արժեքներին ու սկզբունքներին, որոնց ես 30 տարի հավատարմորեն ծառայել եմ՝ պետությանը, բանակին և ժողովրդին։
Ուզում եմ անկեղծ շնորհակալություն հայտնել բոլորին, ովքեր այդ ամիսներին չվախեցան, չընկճվեցին և կանգնեցին իմ ու իմ ընտանիքի կողքին։ Ձեր աջակցությունն ապացուցեց, որ երկրում դեռ կա արժանապատվություն, որը ոչ մի ճնշում չի կարող կոտրել։
Միևնույն ժամանակ, ցավով հաստատում եմ, որ այս փորձությունը բացեց շատերի իրական դեմքերը։ Կային մարդիկ, ովքեր վախից կամ հարմարավետությունից նույնիսկ չփորձեցին կապ հաստատել ինձ կամ իմ ընտանիքի հետ՝ ընդունելով այն սուտն ու քաղաքական շինծու մեղադրանքը, թե ես ահաբեկիչ եմ։
Թող որևէ մեկը չմոռանա՝ մարդ, որ 30 տարի իր կյանքը նվիրել է երկրի պաշտպանությանը, երբեք չի կարող լինել ահաբեկիչ։
Ահաբեկչությունը քաղաքական գործիք է, որը օգտագործում են նրանք, ովքեր վախենում են ճշմարտությունից և փորձում են լռեցնել իրենց անհարմար դարձողներին։
Ես շարունակելու եմ ծառայել այն գաղափարներին, որոնց հավատացել եմ միշտ»։
