Հերթական կաշառքն են նախապատրաստում ընտրություններից առաջ
Ընտրություններից առաջ իշխանությունները հերթական կաշառքն են նախապատրաստում. «Տաշիր կապիտալ» ընկրությանն էլեկտրաէներգիայի բաշխման լիցենզիայից զրկելուց հետո մտադիր են նվազեցնել հոսանքի սակագինը։
Հոսանքի սակագինը նվազեցնելու ՀԷՑ-ի սեփականատիրոջ առաջարկը մերժեցին, որպեսզի լիցենզիայից զրկելուց հետո իրենց վերագրեն սակագնի իջեցումը՝ ընտրողներին կաշառելու համար։
Լիցենզիայից զրկելուց հետո Նիկոլ Փաշինյանը վերսկսել է ՀԷՑ-ի նախկին կառավարիչների ու գործող սեփականատիրոջ վարկաբեկման հերթական արարը։ Մեղադրանքներ է հնչեցնում ու փորձում նրանցից թալանչու կերպար կերտել։
Փողերի լվացումից է խոսում։ Դրանով էլ չի բավարարվում, ցուցումներ է տալիս իրավապահներին, թե ինչ հոդվածներով պետք է մեղադրանքներ ներկայացնեն։ Բայց մոռանում է, որ այդպիսի ձևերով այլևս չի կարող տրամադրություններ փոխել։ Բոլորն էլ արդեն գիտեն, թե ով է Նիկոլ Փաշինյանն, ու ինչ հիմքեր ունեն նրա հայտարարությունները։
Մեղադրանքներ հնչեցնելուց առաջ, լավ կլիներ այն հարցին պատասխանեին, թե ինչո՞ւ հիմա հիշեցին ՀԷՑ-ին ու ՀԷՑ-ի «թալանը»։ Բա եթե այդպես էր, ինչո՞ւ այսքան ժամանակ ոչինչ չեն արել։ ՀԷՑ-ը կառույց է, որի գործունեությունն ամբողջությամբ գտնվում է պետական վերահսկողության տակ՝ ի դեմս Հանրային ծառայությունները կարգավորող հանձնաժողովի։ ՀԾԿՀ-ն էլ լինելով անունով անկախ՝ ենթարկվում է քաղաքական իշխանությանը։ Ու եթե անգամ համարենք, որ ՀԷՑ-ում տարիներ շարունակ, իրենց ասած՝ անօրինականությունն ու թալանն է եղել, ինչո՞ւ ժամանակին ոչինչ չեն արել։
Ո՞վ չի հասկանում, որ այս ամենը քաղաքական է, ինչքան էլ Նիկոլ Փաշինյանն ու ՔՊ-ականներն իրենց ճղեն։
Մեղադրանքներ են հնչեցնում, մեկնաբանություններ են անում, որոնք շատ արագ հերքվում են ու բացահայտում իշխանությունների ստերը։
Սեփականատիրոջը լիցենզիայից զրկելու պատճառներից մեկն էլ, եթե ոչ՝ գլխավորը, համարում էին սերվերից սպառողների սպառած հոսանքի վերաբերյալ տվյալների միտումնավոր ջնջումը։ Քրեական դրամաներ էին հյուսում։
«Բանից պարզվում է՝ 2025 թվականի հունվարի 2-ին, ինչ-որ սերվերի վրա ծրագրային գործողություններ անելու ժամանակ, անհասկանալի պատճառներով կամ իրավիճակում 2018 թվականից մինչև 2024 թվականի հոկտեմբեր-նոյեմբեր ամիսն ընկած ինֆորմացիան ջնջվել է, և այն այս պահի դրությամբ դեռ վերականգնված չէ և նույնիսկ հնարավոր չէ վերականգնել։ Դա խոսում է այն մասին, որ, պատկերացրեք՝ 2018 թվականից մինչև 2024 թվականի հոկտեմբեր հանրապետության բոլոր սպառողների հաշվիչների ցուցմունքները, որ պետք է յուրաքանչյուր երեք ամիսը մեկ արխիվացվեին ու առնվազն հինգ տարի պահպանվեին, այսօր կանգնած ենք փաստի առաջ, որ այդ ինֆորմացիան չկա։ Չքացել է, մեղմ ասած, սա լիցենզիոն լուրջ պարտավորությունների խախտում է»,- ՀԷՑ-ի սեփականատերերին քիչ էր մնում դարի հանցագործության մեջ մեղադրեր ՀԾԿՀ նախագահը։
Կարճ ժամանակ անց պարզվեց, որ տվյալներն ամբողջությամբ վերականգնվել են և հասանելի են։
«Փաստերի ստուգման հարթակը» փորձել է պարզել՝ արդյո՞ք իրականությանը համապատասխանում է ՀԾԿՀ նախագահի հայտարարությունը, որ սպառողների հաշվիչների ցուցմունքներն անհետացել են։ Դիմել են ՀԷՑ ու խնդրել կոնկրետ բնակարանի օգտագործած էլեկտրաէներգիայի վերջին տարիների ցուցմունքները։ Եվ, ով զարմանք՝ ՀԷՑ-ում հաշված րոպեների ընթացքում ներկայացրել են 2019 թվականից 2025 թվականի տվյալները, որտեղ երևում են սպառած էլեկտրաէներգիայի քանակը, սակագինը, ինչպես նաև տույժ-տուգանքների վերաբերյալ տվյալներ։
Երևում է նաև հաշվիչի ցուցմունքները՝ ինչպես ամսվա սկզբին, այնպես էլ՝ վերջին։
Ու սա ՀԷՑ-ի սեփականատիրոջը լիցենզիայից զրկելու հիմնական, եթե ոչ՝ առաջնային պատճառներից մեկն են համարել։
Մյուսների մասին երևի խոսելն ավելորդ է, բայց ևս մեկին արժե անդրադառնալ։
ՀԷՑ-ին մեղադրում են վարկային երաշխիքներ տրամադրելու մեջ, ներկայացնում են, որ դրա հետևանքով համակարգում աշխարհացունց իրավիճակներ կարող էին ստեղծվել, բայց մոռանում են, որ կառավարությունն էլ է պետության հաշվին ուրիշներին վարկային երաշխիքներ տրամադրում։ Ու որքան էլ տարօրինակ է, դրանում վտանգ կամ անօրինական ոչինչ չեն տեսնում։
Ժողովրդին մոլորեցնելու ու ՀԷՑ-ին մեղադրելու համար մեկ այլ բան էլ են հորինել. ասում են՝ կտրուկ բարձրացրել են ցանցին սպառողների միացման վճարները։ Այն դեպքում, երբ ինչպես սակագները, այնպես էլ՝ ցանցին բաժանորդների միացման վճարները քաղաքական իշխանությանը հնազանդ ծառայող ՀԾԿՀ-ն է հաստատում։ ՀԷՑ-ը, անգամ մեծագույն ցանկության դեպքում, դրա հետ կապ չունի։ Ու եթե ինչ-որ մեկը մեղավոր է չհիմնավորված բարձր գին սահմանելու համար, մեղավորը ՀԾԿՀ-ն է։
Երկու տարի առաջ արդարացնում էին ցանցին միանալու վճարների կտրուկ բարձրացումը, այսօր, երբ իրավիճակ է փոխվել ու առաջիկայում ընտրություններ են, պատրաստվում են միացման վճարներն էլ իջեցնել։ Ժամանակին 10 անգամ բարձրացրել են, հիմա մտադիր են 30-40 տոկոսով նվազեցնել ու ցույց տալ, թե նախկին կառավարիչները թալանչիներ էին, իրենք մտածում են ժողովրդի մասին։ Ասում են՝ հիմնավորված չի եղել բարձրացումը։ Հիմնավորողն էլ, չհիմնավորողն էլ հանձնաժողովն է եղել։ Եթե հիմնավորված չի եղել, չհիմնավորված սակագին հաստատելու համար հանձնաժողովի քանի՞ անդամ է մինչև հիմա պատժվել։ Էլ չենք խոսում հանձնաժողովի աշխատակազմի մասին։
Հանձնաժողովին թողած՝ ՀԷՑ-ի սեփականատերերին են մեղադրում հազար ու մի մեղքերի մեջ ու դա հիմք ընդունում՝ լիցենզիայից զրկելու համար։
Սեփականատիրոջը զրկել են լիցենզիայից, մինչև հիմա իրենք էլ չգիտեն, թե ինչ են անելու ՀԷՑ-ի հետ։ Ոչ կարող են պահել պետական, որովհետև այդքան միջոցներ ու կարողություններ չունեն կառավարելու համար, ոչ կարող են վաճառել։ Դժվար է պատկերացնել, որ որևէ խելքը գլխին ներդրող կարող է միջազգային դատական վեճում գտնվող ընկերությունը գնել։
Ինչ մնում է պետական կառավարմանը, ապա տեսնում ենք, թե նույն պետական կառավարման շրջանակներում ինչպես են կառավարում բարձրավոլտ ցանցերը կամ «Վեոլիա ջուրը»։
Հիմա էլ նույն օրն են ուզում գցել ՀԷՑ-ին՝ իրենց քաղաքական խարդավանքների պատճառով։
ՀԱԿՈԲ ՔՈՉԱՐՅԱՆ
