Թուրքիայի ԱԳ նախարարը մտադիր է այցելել Իրան. բանակցությունների օրակարգում է նաև Հարավային Կովկասի իրավիճակը
Թուրքիայի արտգործնախարար Հաքան Ֆիդանը կիրակի օրը նախատեսում է այցելել Թեհրան՝ Իրանի բարձրաստիճան պաշտոնյաների հետ հանդիպումների համար, հայտնում է Tasnim-ը։
Իրանի ԱԳՆ պաշտոնական ներկայացուցիչ Էսմայիլ Բաղային հայտնել է, որ Ֆիդանը հանդիպելու է արտգործնախարար Աբաս Արաղչիի և այլ բարձրաստիճան պաշտոնյաների հետ։ Ըստ նրա, քննարկումները վերաբերվելու են երկկողմ հարաբերություններին, տարածաշրջանային իրադարձություններին և միջազգային խնդիրներին։ Թուրքական դիվանագիտական աղբյուրները նշել են, որ բանակցությունները նվիրված կլինեն Բարձր մակարդակի համագործակցության խորհրդի ամրապնդմանը և դրա իններորդ նիստի նախապատրաստական աշխատանքների վերանայմանը։
Կողմերը ձգտում են խորացնել համագործակցությունը անվտանգության և ահաբեկչության դեմ պայքարի ոլորտում։ Սպասվում է, որ պաշտոնյաները կքննարկեն նաև սահմանային առևտրի ենթակառուցվածքների զարգացումը և երկկողմ ապրանքաշրջանառության ավելացումը՝ 6,5 միլիարդից մինչև 30 միլիարդ դոլար։ Ֆիդանը մտքեր կփոխանակի իրանցի պաշտոնյաների հետ տարածաշրջանային կայունության վերաբերյալ՝ ներառյալ Գազան, Սիրիան և Իսրայելի գործողությունները։ Իրանի միջուկային ծրագրի խաղաղ կարգավորումը նույնպես կլինի քննարկումների մաս։
Ռուսաստանի և Ուկրաինայի պատերազմը, Հարավային Կովկասի իրադարձությունները և Պակիստան-Աֆղանստան հարաբերություններում լարվածության թուլացման ջանքերը կլինեն օրակարգի լրացուցիչ հարցերը։
