Շտայնմայերը Brexit-ն ամենամեծ կորուստն է համարել Մեծ Բրիտանիայի ինքնիշխանության համար
Brexit-ի մասին որոշումը կարող է ամենազգալի կորստին հանգեցնել Մեծ Բրիտանիայի ինքնիշխանության համար: Այդ մասին ասված է ԳՖՀ-ի նախագահ Ֆրանկ Վալտեր Շտայնմայերի ճառում, որը գերմանական պետության ղեկավարն ապրիլի 4-ին Ստրասբուրգում կարտասանի Եվրախորհրդարանում:
Ճառից հատվածներ է հրապարակել Reuters գործակալությունը: «Հնարավոր է՝ Brexit-ը բրիտանական ինքնիշխանության ամենամեծ կորուստն է… Եթե մենք համաշխարհային ասպարեզում Եվրոպան չդարձնենք լիարժեք խաղորդ, ապա մենք առանձինառանձին գնդակ կդառնանք մյուս խաղորդների համար»,-կարծում է նախագահը:
Շտայնմայերի խոսքով՝ «մոլորություն է այն փաստը, թե ԵՄ-ից դուրս գալու օգնությամբ կարելի է լիակատար հսկողություն հաստատել իր երկրի նկատմամբ», բրիտանացի ազգայնականները «չեն կարող իրականացնել այդ խոստումը»: Նա «անպատասխանատու» է համարել մարդկանց այն բանում համոզելը, թե «եվրոպական երկիրը միայնակ կամ ԵՄ-ից դուրս ավելի մեծ ազդեցություն եւ հնարավորություններ կունենա տնտեսական շահերի իրացման համար»:
Նա ընդգծել է, որ Գերմանիան շահագրգռված է ԵՄ-ի պահպանմամբ, այդ հարցում «առանձնահատուկ պատասխանատվություն» է կրում որպես հանրակցության խոշորագույն երկիրը, բայց իրեն հաշիվ է տալիս «իր հնարավորությունների սահմանների» մասին: Շտայնմայերը հավելել է, որ Բեռլինում ցանկանում են դառնալ «եվրոպական Գերմանիա»: Ավելի վաղ եվրոպացի առանձին քաղաքական գործիչներ հայտարարում էին, որ ԳՖՀ-ն ձգտում է «գերմանականացնել Եվրոպան»,-հաղորդել է ՌԻԱ Նովոստին: