Թուրքիան և Ռուսաստանը համաձայնեցրել են Սիրիայում հրադադարի հաստատման պլանը
Թուրքիան և Ռուսաստանը համաձայնեցրել են Սիրիայում լայնամասշտաբ հրադադարի հաստատման պլանը, որը ներկայացվելու է Սիրիայում հակամարտող կողմերին, հայտնում է «Անադոլու» գործակալությունը՝ վկայակոչելով հավաստի աղբյուրներին։
Նշվում է, որ Հալեպի արևելյան շրջաններում հրադադարի մասին պայմանավորվածությունից հետո Անկարան և Մոսկվան եկել են համաձայնության պլանի հարցով, որը ենթադրում է հրադադարի տարածում ողջ Սիրիայի տարածքում։
Վերոնշյալ պլանը նախատեսվում է ներկայացնել սիրիական հակամարտության մասնակիցներին։
Պայմանավորվածության գործողությունը կընդգրկի բոլոր շրջանները, որտեղ մարտեր են ընթանում ընդդիմադիր խմբավորումների և Սիրիայի կառավարական բանակի միջև։
Թուրքիայի և Մոսկվայի պայմանավորվածության շրջանակում հակամարտող կողմերին առաջարկվելու է դադարեցնել ռազմական գործողությունները դեկտեմբերի 29-ին՝ ժ. 00:00-ից։
Հրադադարի մասին պայմանավորվածությունը չի տարածվելու ահաբեկչական խմբավորումների վրա։
Համաձայնագրի հաջողության դեպքում հակամարտող կողմերը Աստանայում բանակցություններ են սկսելու սիրիական հակամարտության կարգավորման ուղղությամբ։
