ՎՏԲ-Հայաստան բանկը սկսել է հաճախորդների գումարների վերադարձման գործընթացը
ՎՏԲ-Հայաստան բանկն արդեն սկսել է զեղծարարության արդյունքում քարտից կորցրած գումարների վերադարձը հաճախորդներին: Այս մասին ի պատասխան մեր հարցման՝ տեղեկացրին բանկի մամուլի ծառայությունից։
Հիշեցնենք, երեկ առավոտյան բացահայտվել էր, որ ՎՏԲ-Հայաստան Բանկի կողմից թողարկված քիչ քանակությամբ քարտերից (մինչև 200 հատ), երկրի սահմաններից դուրս նախաձեռնվել են զեղծարարության գործարքներ:
ՎՏԲ-Հայաստան բանկը երեկ պաշտոնապես հայտարարել էր. եթե բացահայտվի, որ գումարը հաճախորդի քարտից գանձվել է 03.03.2016թ. առավոտյան` զեղծարարության գործարքի արդյունքում, այսինքն՝ նախաձեռնվել է ոչ թե հաճախորդի կողմից կամ իր մեղքով, ապա կվերցնի բոլոր ծախսերն իր վրա և կապահովի քարտից կորցրած գումարների վերադարձը հաճախորդներին:
Լրատվական ծառայությունից մեզ տեղեկացրին, որ հաճախորդների գումարների վերադարձի գործընթացն ամբողջությամբ կավարտվի մինչև օրվա վերջ, ինչից հետո բանկը հանդես կգա պաշտոնական հաղորդագրությամբ։
