100 LIVES նախագծի շրջանակում տեղի ունեցավ երգահան Մարինե Ալեսի «Ձեզանից մեկը….» խորագրով համերգաշարը
«Հայաստանի զարգացման նախաձեռնություններ» (IDeA) հիմնադրամի 100 LIVES (100 Կյանք) նախագիծը հանդես է գալիս նոր նախաձեռնությամբ՝ ներկայացնելով երգահան եւ բանաստեղծուհի Մարինե Ալեսի «Ձեզանից մեկը….» խորագիրը կրող համերգաշարը: Մեկնարկը տրվեց հոկտեմբերի 28-ին Գյումրիի Վարդան Աճեմյանի անվան պետական դրամատիկական թատրոնում, այնուհետեւ հոկտեմբերի 30-ին շարունակվեց Թբիլիսիում՝ Կոտե Մարջանաշվիլիի անվան ակադեմիական թատրոնում եւ եզրափակվեց Սանկտ Պետերբուրգում՝ Պետական Էրմիտաժի թատրոնում: Թբիլիսիում կայացած համերգին ներկա էին նաեւ ՀՀ նախագահ Սերժ Սարգսյանը եւ առաջին տիկին Ռիտա Սարգսյանը:
Համերգաշարի նպատակը հանրությանը 100 LIVES նախագծի եւ նրա առաքելության մասին եւս մեկ անգամ իրազեկելն էր: Հիշեցնենք, որ 100 LIVES նախագիծը կոչված է երախտիքի տուրք մատուցելու այն անհատներին ու կազմակերպություններին, որոնք 100 տարի առաջ հերոսական ջանքերի գնով հարյուր հազարավոր հայերի են փրկել Ցեղասպանությունից։
Համերգների ընթացքում Մարինե Ալեսի ստեղծագործությունների կատարումները զուգորդվում էին Ցեղասպանությունը վերապրողների փրկության պատմություններով: Երգահանի հայտնի ու նոր ստեղծագործությունները կատարում էին Ֆորշը, Դավիթ Ամալյանը, Գեւորգ Հակոբյանը, Ջանինան, Ջիվան Գասպարյան կրտսերը՝ «Կադանս» անսամբլի նվագակցությամբ:
Համերգներն անցան լեփ-լեցուն դահլիճներում եւ ջերմորեն ընդունվեցին հանդիսատեսի կողմից: Համերգներին զուգահեռ՝ Մարինե Ալեսը հանդիպումներ էր ունենում նաեւ տեղի ստեղծագործական հանրույթի հետ: Հատկապես հուզիչ էր հանդիպումը Վիրահայոց թեմի «Հայարտուն» կրթամշակութային եւ երիտասարդական կենտրոնում, որի սաները երգահանին զարմացրեցին նրա իսկ ստեղծագործությունների գեղեցիկ կատարումներով:
«Տպավորված եմ հանդիսատեսի ջերմ ընդունելությունից. թե՛ Գյումրիում, թե՛ Թբիլիսիում ու Սանկտ Պետերբուրգում զգում էի դահլիճի էներգետիկան ու լուռ հավանությունը: Ուրախ եմ նաեւ, որ կարողացա օգտակար լինել 100 LIVES նախագծին եւ եւս մեկ անգամ արվեստի միջոցով հանրությանը տեղեկացնել ծրագրի նշանակության ու գաղափարախոսության մասին»,-ամփոփելով համերգաշարը՝ նշեց Մարինե Ալեսը:
«Համերգների նպատակը հանրությանը 100 LIVES ծրագրի մասին իրազեկելն էր եւ մշակույթի միջոցով Ցեղասպանությունից բազմաթիվ փրկության պատմություններ ներկայացնելը՝ մեկ անգամ եւս հիշեցնելով, որ մենք միայնակ չենք եղել, այլ մեզ օգնել են տարբեր ազգությունների բազմաթիվ մարդիկ: Մեկնարկը մենք որոշեցինք տալ Գյումրիում, որպես վերապրող քաղաք, որը 100 տարի առաջ ընդունել է ավելի քան 30 հազար որբի: Գրական-երաժշտական երեկոյի ձեւաչափով եւ հստակ ուղերձով այս համերգը բավականին պահանջված էր, եւ մենք զգացված ենք հանդիսատեսի ընդունելությունից: Մտադիր ենք առաջիկայում համերգային ծրագիրը ներկայացնել նաեւ արտերկրի այլ քաղաքներում»,-նշեց 100 LIVES նախագծի համագործակցության հարցերով տնօրեն Արեն Ափեկյանը:
100 LIVES նախագիծն ու Մարինե Ալեսը նաեւ նվերներ էին պատրաստել Թբիլիսիի եւ Սանկտ Պետերբուրգի հայ համայնքների մշակութային կենտրոնների, ինչպես նաեւ Գյումրիի երաժշտական դպրոցի սաների համար: Վիրահայոց թեմի «Հայարտուն» կրթամշակութային եւ երիտասարդական կենտրոնի պարի խմբին նրանք ազգային տարազներ, իսկ Սանկտ Պետերբուրգի Սուրբ Կատարինե եկեղեցուն կից մշակութային կենտրոնին՝ դաշնամուր նվիրեցին: Գյումրիի Շերամի անվան երաժշտական դպրոցն ու Գյումրիի քաղաքապետարանի «Անի» նվագախումբը փողային գործիքներ ստացան:
«Հայաստանի զարգացման նախաձեռնություններ» (IDeA) հիմնադրամի հանրային կապերի բաժին
