«Թող Ձեր իմաստուն միտքը հանճարներ ծնի հայոց ազգին»
Հայոց աշխարհի լուսաշող դպրոցականնե՛ր և ոգետենչ ուսանողնե՛ր, իմաստուն ուսուցիչնե՛ր և դասախոսնե՛ր, հայրենատեր ծնողնե՛ր, «Հայոց Արծիվներ» հայրենասիրական հասարակական կազմակերպության Նախագահության և անձամբ իմ անունից ջերմորեն շնորհավորում եմ Անկախության սերնդի տոնը՝ գիտելիքի, գրի և դպրության օրը՝ Սեպտեմբերի 1-ը, որպես նոր ուումնական տարվա սկիզբ և առաջին մուտք իմաստնության կաճառներից ներս, մաղթելով նրանց ուժ, եռանդ, աշխատասիրություն, պատասխանատվություն և ամենակարևորը՝ հզոր ու անխոցելի Հայրենիք:
Թանկագին զավակնե՛ր, միշտ գիտակցեք, որ Դուք Հայոց Ազգի վաղվա լուսաբացներն եք, և վաստակել եք «Զարթոնքի սերունդ» կոչվելու իրավունքը, որովհետև հայ ազգային ազատագրական պայքարի թոհ ու բոհի մեջ ծնված Հայոց անկախ պետականության մեջ Դո՛ւք եք մեծ և հզոր, քրիստոնյա Հայաստանի կերտողները:
Թող Ձեր իմաստուն միտքը հանճարներ ծնի հայոց ազգին, իսկ Ձեր ամուր բազուկը անխոցելի պահի մեր Հայրենիքը:
Հարգարժան ուսուցիչնե՛ր և դասախոսնե՛ր, Ձեզ վստահելով ազգի ապագան, համոզված ենք, որ Դուք Մաշտոցյան լույսի ջահակիրն եք եղել և շարունակելու եք լինել, որպես նրա արժանի ժառանգորդ, որովհետև Ձեր ափի մեջ է Անկախության սերնդի վաղվա ճակատագիրը…
«Ազգ, Հայրենիք, Պետականություն»՝ ահա համայն հայության հավերժության հիմքը:
Աստված բոլորիս պահապան:
«Հայոց Արծիվներ» հայրենասիրական հասարակական Կազմակերպության հիմնադիր նախագահ Խաչիկ Ասրյան
