Քաշաթաղի շրջանում նորից հրդեհ է բռնկվել. վնասի չափերը ճշտվում են
Հունիսի 14-ին, կեսօրին, Քաշաթաղի շրջանի Թովմասարի տարածքում նորից հրդեհ է բռնկվել:
Այս մասին «Արցախպրես»-ին Թովմասարից հայտնեց Քաշաթաղի շրջվարչակազմի «Մերան» պաշտոնաթերթի խմբագիր Զոհրաբ Ըռքոյանը: Մի քանի մետր բարձրության հասնող կրակի դեմ պայքարել են շրջանի հարավային և հյուսիսային թևերի բնակիչները և արտակարգ իրավիճակների աշխատակիցները:
Օրվա ընթացքում արդեն երկրորդ անգամ տարածք է մեկնել նաև ԼՂՀ վարչապետ Արայիկ Հարությունյանը, այնտեղ էր նաև գյուղնախարար Անդրանիկ Խաչատրյանը: Աղբյուրի հաղորդմամբ` շատ մեծ դժվարությամբ է հաջողվել մարել կրակը, քանի որ ուժեղ քամու առկայությունը խանգարել է հրդեհաշիջման աշխատանքներին:
Հրդեհը վնաս է հասցրել ցորենի ու գարու ցանքատարածություններին, վնասի չափերը ճշտվում են: Զոհրաբ Ըռքոյանի հավաստմամբ, բարեբախտաբար, վնասի չափերը մեծ չեն:
