Ատլանտյան օվկիանոսում հայտնաբերվել են նացիստների ջրասույզ արած բրիտանական նավի գանձերը՝ 50 միլիոն դոլար. Daily Mail
Daily Mail-ի փոխանցմամբ՝ Deep Ocean Search ընկերությունը հայտնաբերել է արծաթյա դրամների պահոց, որոնց արժեքը գնահատվում է 34 միլիոն ֆունտ սթեռլինգ (ավելի քան 50 միլիոն դոլար):
Բեռը հայտնաբերվել է բրիտանական City of Cairo շոգենավի բեկորների շրջանում, որը նացիստական սուզանավի հարձակման հետևանքով խորտակվել է 1942 թվականի նոյեմբերին:
Ընդգծվում է, որ որոնողական խմբին հաջողվել է գրանցել համաշխարհային ռեկորդ՝ կապված պատմության մեջ ամենախորջրյա որոնողական գործողությունն իրականացնելու հետ:
City of Cairo նավը 1942 թվականին տվյալ ժամանակվա Բոմբեյից (ներկայիս Մումբայ) շարժվել է Անգլիայի ուղղությամբ, նավի վրա գտնվել է 100 տոննա արծաթյա դրամներ, որոնք պատկանել են Մեծ Բրիտանիայի ֆինանսների նախարարարությանը և նախատեսված են եղել ռազմական գործողությունները ֆինանսավորելու համար:
Այն բանից հետո, ինչ գերմանական սուզանավը տորպեդահարել է նրան, նավը ջրասույզ է եղել 5150 մետր խորության վրա: Մինչև 2011 թվականը նավը համարվել է անհետ կորած, մինչև որ այն չհայտնաբերեցին Deep Ocean Search-ի հետազոտողները՝ բրիտանական կառավարության հետ պայմանագրին համապատասխան:
Չնայած բոլոր դժվարություններին՝ 2013 թվականի սեպտեմբերին Deep Ocean Search-ի առաքելությունը պսակվեց հաջողությամբ, սակայն նրա փորձագետներին թույլատրվել է այդ մասին բարձրաձայնել միայն ներկայումս:
Ներկա դրությամբ դրամներն արդեն իսկ հալեցվել և վաճառվել են, իսկ ստացված միջոցները (ստույգ թիվը չի հաղորդվում) միմյանց միջև կիսել են Մեծ Բրիտանիայի ֆինանսների նախարարությունն ու որոնողական աշխատանքների մասնագետները:
