Խաղաղ օվկիանոսում նոր կղզի է գոյացել
BBC News-ի փոխանցմամբ՝ Խաղաղ օվկիանոսի հարավային հատվածում գոյացել է նոր կղզի: Դա տեղի է ունեցել ստորջրյա հրաբխի ժայթքման շնորհիվ: Կղզին գտնվում է Տոնգայի թագավորության մայրաքաղաք Նուկուալոֆայից 45 կիլոմետր հեռավորության վրա:
Կղզու երկարությունը կազմում է 1.8 կիլոմետր, իսկ լայնությունը՝ 1.2 կիլոմետր: Սակայն գիտնականները զգուշացրել են նրա անկայունության մասին. կղզին կարող է մասնատվել և անցնել ջրի տակ: Այն գլխավորապես բաղկացած է հրաբխային խարամից:
Խունգա Տոնգա-Խունգա Խաապայ հրաբուխը սկսել է ժայթքել դեկտեմբերին: Արդեն օրեր անց արբանյակային լուսանկարներում ի հայտ են եկել կղզու ուրվագծերը: Զբոսաշրջիկները կղզու մեջտեղում հայտնաբերել են կանաչ լիճ:
